Noman Çelebicihannıñ añına

23 Fevral 2023

Kiçik aynıñ 23-ünde Ukraina ve qırımtatar halqınıñ tarihında qara kün – qırımtatar halqınıñ meşur siyasiy ve içtimaiy faalcisi, Qırım, Litvaniya, Lehistan ve Belarus musulmanlarınıñ müftisi, “Ant Etkenmen” adlı qırımtatar milliy gimniniñ müellifi, I. Qurultaynıñ (1917 s.) teşkilâtçılarından biri, Qırım Halq Cumhuriyetiniñ Başı (1917-1918 ss.) Noman ÇELEBİCİHANnıñ azaplı ölüminiñ 105. seneligi.

Noman Çelebicihannıñ başlığınen Qırım Halq Cumhuriyetiniñ teşkil etilgen Ükümetiniñ programma beyanatında qayd etildi ki: “Qırımtatar milliy ükümeti, tek tamır halqınıñ bahtı ve adiy yaşayışını temin etmeli degil, em de yardımadanıñ sakinlerini azaplardan, anarhiyadan ve isyanlardan qorumalı, olarnıñ ayatı ve namüsini qorçalamalı, ve bunı öz muqaddes vazifesi olaraq tanıy”. 

1918 senesi kiçk aynıñ 23-ünde gece maalinde Aqyar şeerindeki apishanede Noman ÇELEBİCİHAN öldürildi.

Soviet seneleri kommunist mefkürecilerniñ emrinen Noman ÇELEBİCİHANnı añmağa yasaqlandı.

Ukrainanıñ mustaqilligi zamanlarında Noman ÇELEBİCİHANnıñ adı Qırım, qırımtatar halqı, Ukraina devletiniñ tarihında itibarlı bir yer aldı.

2022 senesi Ukraina Silâlı Quvetlerinde Noman ÇELEBİCİHANnıñ adına arbiy bölük bar, anda Ukraina vatandaşları – Qırımnıñ sakinleri hızmet eteler.

Bugün rfnıñ işğal etkeni Qırımda, qırımtatar diasporasınıñ yaşağanı vilâyet merkezlerinde ve Ukrainanıñ qıtaviy topraqlarındaki başqa meskün yerlerde, farqlı ülkelerde añma tedbirleri, dualar keçirilir, sergiler açılır, içtimaiy ağlarda qırımtatar halqınıñ ürmetli oğlu Noman ÇELEBİCİHAnnıñ añına bağışlanğan fleş-moblar keçirilecekler. 

Faqat Noman ÇELEBİCİHANnıñ añına ve qırımtatar halqınıñ menfaatına büyük faaliyetine ürmetimizni bildirecek eñ müim areket, Qırımnıñ rus varvarlarından azat etilmesi ve Ukrainanıñ Qırım yarımadası üzerinde mustaqilliginiñ yañıdan pekitilmesi olacaq.

Nurlar içinde yatsın!

Allah rahmet eylesin!

Refat Çubarov

Qırımtatar Milliy Meclisiniñ Başı

Kıyiv ş. 2023 senesi kiçik aynıñ 23-ü