Kıyivde “Qırımnıñ sesi. Nariman Celâl” vesiqalı filminiñ premyerası olacaq

21 Fevral 2023

Kiçik aynıñ 26-sında Kıyiv şeerinde Film evinde “Qırımnıñ sesi. Nariman Celâl” vesiqalı filminiñ ukrain premyerası olacaq, dep “Qırım SOS” uquq qorçalayıcı teşkilâtı haber berdi.

“Qırım SOS”nen ortaqlığında “İçtimaiy menfaatlı jurnalistika ameliyathanesi”, Nariman Celâl aqqında vesiqalı filmni yarattı. Filmniñ rejisöri – Hanna Tsıhima, prodüseri – Nataliya Humenük.

Filmni kösterecek soñ seyircilerni “Qırım-Qarşılıq-Ğalebe” panel muzakeresine qatılmağa davet eteler. Moderatorı – Alim Aliyev, Ukrain institutınıñ baş müdiriniñ muavini.

Bundan ğayrı, ziyaretçiler “U(CRIME)A. Rus işğali astında Qırım artleyha sergisini baqa bilirler. Ukrain resimcisi İrına Vale, yarımadanıñ 8 senelik rus işğali astında ayatı aqqında 10 resim yarattı. Resimler, rusiyeniñ Qırımda cinayetleri ve neticelerini, tınç qarşılıq, Qırımnıñ qıtaviy Ukrainanen metinli bağını köstereler.