Meclis ve QMM, Qırımnıñ meskün yerlerine tarihiy adlarını qaytarmağa teşebbüs eteler

14 Fevral 2023

Meclis ve Qırımtatar maaliy merkezi, “Adlarnı qaytarayıq – Qırımnı qaytarayıq” malümat ve advokat kampaniyasını başladılar. Onıñ çerçivesinde vaqtınca işğal etilgen Qırımnıñ meskün yerleri, suv obyektleri, demiryol stantsiyalarınıñ tarihiy adlarını qaytarmağa teşebbüs eteler.

Ukrinformda matbuat konferentsiyası vaqtında Qırımtatar Milliy Meclisiniñ uquqiy meseleler ve tış işleri idaresiniñ başı, Qırımtatar maaliy merkeziniñ idare başı Eskender Bariiev bunı bildirdi.

– Biz – Meclis, Qırımtatar maaliy merkezi – vaqtınca işğal etilgen Qırımnıñ meskün yerleriniñ adlarını deñiştirüv aqqında Ukraina Yuqarı Şurasınıñ buyruğını azırlav ceryanını başlatmaq içün Nazirler Kabinetine bir mektüp azırladıq. QMMniñ uquçıları, Ukrainanı yañıdan quruv meseleleri vitse baş naziri – Ukrainanıñ cemaatı, topraqları ve astyapısınıñ inkişafı nazirine Qırımnıñ topraqlarındaki demiryol stantsiyalarınıñ adlarını deñiştirüv aqqında bir mektüp azırladılar. Çünki çoqusınıñ adları soviet ve müstemlekecilik adlarıdır. Olar içün biz bu stantsiyalarnıñ yerleşkenleri meskün yerlernen bağlı olğan adlarnı azırladıq. Suv obyektleriniñ adlarını deñiştirmek içün Suv hocalığı eyyetine hitaplar yollandı. Ukrainanıñ haritacılığında adlar deñişseler, olar em de halqara harita müessiselerinde deñiştirilecek. Qırımnıñ saibi kim olğanını köstermelimiz, – dep Bariiev añlattı.

Bariiev qayd etti ki, vaqtınca işğal etilgen ukrain Qırımda soviet ve müstemlekecilik adlarını deñiştirmege bir qaç qanun imkân bere.

– Şu cümleden, “Milliy hususiyetlerge köre sürgün etilgen kişilerniñ aqlarını yañıdan yaratuv aqqında” Ukraina qanunınıñ 5. maddesinde qayd etildi ki, devlet sürgün etilgen kişilerni Soviet zamanlardında sürgünliknen baplı olğan yañıdan adlandırılğan meskün yerlerniñ tarihiy adlarını qaytaruv aqqını temin ete. Bundan ğayrı, “Ukrainanıñ tamır halqları aqqında” Ukraina qanunınıñ 3. maddesinde qayd etildi ki, tamır halqlarınıñ tarihiy toponimikasını qaytarmaq maqsadınen salâhiyet organlarınen mesleattan soñ Nazirler Kabineti, Ukraina Yuqarı Şurasınıñ baqmasına tesbit etilgen yol-yoruqqa köre meskün yerlerniñ adlarını deñiştirüv aqqında buyruq leyhasını berecek, – dep Bariiev tafsilâtlıca añlattı.