Meclis “Yahşı qomşu – eñ yaqın qoranta” umumiy ukrain tedbirini ilân ete

10 Fevral 2023

2023 senesi kiçik aynıñ 6-sında Türkiyeniñ cenübiy ve merkeziy topraqlarında ciddiy viraneler ve insan ğayıplarınıñ neticesi olğan şiddetli bir zelzele oldı.

Türkiye Cumhuriyetiniñ yayınlağanı soñ malümatqa köre, Kahramanmaraş, Gaziantep, Şanlıurfa, Diyarbakır, Adana, Adıyaman, Osmaniye, Hatay, Kilis, Malatya ve Elazığ bölgelerinde 17 134 kişi öldi ve 70 347 kişi yaralandı.

Ukraina, dünyanıñ eñ az 60 ülkesinen beraber, Türkiyege ve halqına yardım etmege deral başladı: 87 kişiden, şu cümleden 18 qurtarıcı tehnika ve 10 qıdırıcı köpekten ibaret olğan Ukraina fevqulâde vaziyetler devlet hızmetiniñ qıdırıcı-qurtarıcı gruppası zelzeleden zarar körgen bölgelerge kelip qurtarıcı işlerni yapmağa başladı. 

Tük cemaatı, 9 senedir devam etken rus silâlı tecavuzınıñ neticesinde soñ derecede zor ve dramatik vaziyetlerde bulunğan ukrain halqınıñ bu tür merametli areketini minnetdarlıqnen rastkeldi. 

Tabiiy felâket neticesinde viranelerniñ miqyası ve şiddetli zelzeleden zarar körgen insanlarnıñ sayısı o qadar büyük ki, Türkiye ükümetiniñ ve yardım etken başqa ülkelerniñ balaban ğayretlerine baqmadan, qış ve bala urbası, şahsiy gigiyena eşyaları ve içtimaiy sanitariya, qaytantıcılar, büyük çadırlarğa ihtiyac bar.

Türkiyeniñ zelzeleden zarar körgen topraqlarında yaşağan insanlarnıñ şimdiki ihtiyaclarının çoqusı, rus raketa ateşleriniñ neticelerini yaşağanı Ukrainanıñ şeerleri ve qasabalarınıñ sakinleriniñ ihtiyaclarına beñzeyler.

Ukraina halq ikmetinde “Yahşı qomşu – eñ yaqın qoranta” kibi bir ata sözü bar. O da ukrainalılarnıñ qomşularınen munasebetlerinde insan sevgili göñüllerini kösterir.

Ukrainalılarnıñ böyle hususiyeti, qomşularınen munasebetlerine büyük mana qoyğan qırımtatarlarnıñ dünya baqışına pek yaqın: «Ev alma, qomşu al».

Bunıñ içün 9 senedir devam etken rus-ukrain cenki, biñlerce kişini öldürgen ve yüzlerce şeer, köy ve qasabanı viran etken Ukrainanıñ topraqlarını rus raketalarınen kütleviy ateşler, Qırımnıñ işğali ce rus işğalcileriniñ yapqanı tamır qırımtatar halqınıñ sürgünligi sebebinden Ukraina ve vatandaşları içün o qadar vaqıtlarda da Qırımtatar Milliy Meclisi, “Yahşı qomşu – eñ yaqın qoranta” umumiy ukrain tedbirini keçirmege teşebbüs ete. Bu tedbir, 2023 senesi kiçik aynıñ 6-sında viran etici zelzelelerden zarar körgen Türkiye vaatndaşlarına gumanitar yardımğa yönelgendir.

Bir ay boyunca, şu cümleden 2023 senesi kiçik aynıñ 13-ünden 2023 senesi saban ayınıñ 13-üne qadar “Yahşı qomşu – eñ yaqın qoranta” umumiy ukrain tedbiri keçirilecek.

Qırımtatar halqınıñ lideri, Ukraina halq mebusı Mustafa CEMİLEV ve Qırımtatar Milliy Meclisiniñ Başı Refat ÇUBAROVnıñ iştirakinen kiçik aynıñ 11-inde saat 13`te online şeklinde olacaq matbuat konferentsiyası vaqtında Ukraina vatandaşları ve teşkilâtlarından toplanacaq ilk kerekli eşyalar cedveli ve gumanitar yardım türleri, olarnı vesiqalaştıruv yol-yoruğı, toplanma yeri ve saati bildirilecek.

qrm.mejlis@gmail.com elektron poçtası vastasınen jurnalistler ve KHVnıñ vekilleriniñ akreditatsiyasın keçirilir. Lütfen, akreditatsiya mektübinde jurnalistniñ adı, KHVnıñ adı, qarşı alâqa içün telefon nomerası, ZOOMğa kirmek içün parol yollanacağı elektron poçta yazmağa unutmañız.

Qırımtatar Milliy Meclisiniñ 

Matbuat hızmeti