Elvida, safdaşımız Remzi ağa ABLA

02 Fevral 2023

Aqmescitte yaşağan Milliy areketimizniñ faal iştirakçisi, tarihiy Ekinci Milliy Qurultayımızda Teftiş Komissiyanıñ reisi, metanetli ve cesür vatanperver – Remzi Anafi oğlu ABLA bu dünyanı terk etti.

Remzi ağa 1937 senesiniñ küzünde, Yalta şeerinde doğdı. Cenk yıllarını qorantası – qartbabası bir vaqıtları imamlıq yapqan – Kök-Közde keçirdi. Andan da episi deşetli ve zulumlı sürgün yoluna tüştiler.

Remzi ağanıñ ösmürligi-gençligi Andijan vilâyetiniñ Şahrihan şeerinde keçti. Mektep, avto-yol tehnikumı, soñra Qırğızstannıñ Oş vilâyetinde zenaat boyunca avtoişhanede emek, şu cümleden, yolbaşçılıq – faaliyetiniñ emiyetlı basamaqlarıdır.

1963 senesi Milliy areketke qoşulğanda, R. ABLA, yaş olsa da, endi bayağı tecribe saibi, çeşit insanlarnen munasebet qurmağa bilgen insan edi. Bu sebepten o, qomşu Andijan ve Oş vilâyetlerindeki qırım teşebbüsçi guruhlar arasında bağlayıcı, yani alâqa ve teşkiliy işlerini alıp barıcısı oldı.

Bunen beraber, Qırım davası qızğan 1966-69 seneleri Remzi ağa miting ve diger kütleviy aktsiyalar ötkerilmesine öz issesini qoşqan edi. Böyle faallik, ebet, boşuna qalmay: KGB onıñ peşine tüşüp, açıq taqiplerge oğrata başladı. Qorantada Vatanğa avdet olmaq qararı alına.

1970 s. başında Remzi babasınen Qırımğa keleler. Saq rayonında endi evni satın alacaq olıp, qorantanı köçürecekte, milisler olarnı Herson vilâyetindeki Novo-Alekseyevka qasabasına çıqarıp bıraqalar. Mında beş yıl yaşağan soñ, Remzi ağa israrlıq ile kene de Qırımğa qayta. Qarasuvbazar rayonınıñ başta Aylanma (bugünki sahte adı Povorotnoye), soñra Çoqraq (sahte adı Rodniki) köylerinde yerleşe, çilengir, ustahaneler müdiri olıp çalışa.

Qanda olsa da, R. ABLA Milliy areketniñ ög saflarında bulundı, mesülietli vazifeler becerdi. General P. Grigorenko, akademik A. Saharovnen körüşti. Kene de teşkiliy işlernen, teşebbüsçi gruppalarnıñ faaliyetini teminlemeknen oğraştı.

1989 s. Qırımtatar Milliy Areket Teşkilâtını (QMAT – OKND) meydanğa ketirgenler arasında ve Qarasuvbazar rayonında onıñ reisdeşi oldı.

1991 s. o, Qarasuvbazardan Ekinci Milliy Qurultay mebusı saylandı. Mında da ilk Teftiş komissiyasına aza ve onıñ toplaşuvında reis vazifesine saylandı. 1996 ve 2002 ss. Üçünci ve Dörtünci Qurultaylarda Milliy Meclis azası ve bu qurumnıñ toplaşuvlarında reisniñ muavini saylandı.

Meclisniñ terkibinde Remzi ağa içtimaiy-iqtisadiy ve teşkiliy meselelernen çoq oğraştı. Kene de mitingler ve cümle siyasiy, narazılıq aktsiyalarda, akimiyetnen olğan muzakerelerde faal iştirak etti, halqımıznıñ menfaalarını qorçaladı.

R. ABLA’ni tanığan-bilgenler, dost sayğanlarınıñ hatırasında o, emeksever, daima ögge ıntılğan, semetdeşlerine nisbeten sabırlı, soñ derecede vatanperver, milleti içün daima ğurur sezgen ve onı aşalamağa kimsege imkân bermegen bükülmez ve qorqu bilmez insan olaraq qalacaqtır.

Remzi ağa Anafi oğlu vefat etkeni munasebetinen onıñ qorantasına – evlâtlarına, torunlarına, cümle soy-aqrabalarına teren taziye bildiremiz, sabır ve baş sağlığı tileymiz.

Alla rahmet eylesin.

Qırımtatar Milliy Meclisi

Bütündünya Qırımtatar Kongressiniñ icra komiteti,

Milliy areketteki safdaşları, dostları.