Meclisnen beraber UMF, Qırımnıñ tamır halqlarınıñ medeniyetini destek etmek içün grant başlattı

02 Fevral 2023

Qırımtatar Milliy Meclisinen Ukrain medeniy fondu, Qırımnıñ tamır halqlarınıñ medeniyetini ve Azaq ve Qara deñizleri ögündeki topraqlarnıñ yekâne qavmiy medeniyetlerini destek etmek etmek içün grant başlattı.

Bu senelik “Medeniyet. Bölgeler” grant programması çerçivesinde Ukrain medeniy fondu, “Tamır halqlarınıñ medeniyeti, Azaq ve Qara deñizleri ögündeki topraqlarnıñ yekâne qavmiy medeniyeti” LOTnı yarattı. O, rusiyeniñ bu bölgelerni işğal etkeni sebebinden telükeli vaziyette bulunğan Qırımnıñ, Azaq ve Qara deñizleri ögündeki topraqlarnıñ medeniyetini saqlamaq, inkişaf etmek ve rağbetleştirmek içün Qırımtatar Milliy Meclisinen beraber işlenip azırlandı.

“UKRİNFORM” agentliginiñ matbuat merkezinde “Medeniyet. Bölgeler” yañartılğan grant programmasını taqdim etkende Qırımtatar Milliy Meclisiniñ başı Refat Çubarov ve Ukrain medeniy fondunıñ icra müdiri Vladıslav Berkovskıy bunı añlattılar.

– Bugünki şartlarda yerli medeniyetni destek etmek soñ derecede müimdir. Mında, serbest Ukrainanıñ toprağında, birleşip, rusiyeniñ mezkür topraqlarnı vaqtınca işğale etkenine ve anda er şeyni yoq etmege ıntılğanına baqmadan Qırımnıñ tamır halqlarınıñ ve Azaq ve Qara deñizleri ögündeki topraqlarnıñ qavmiy halqlarınıñ mediyeti, ananelerini saqlamaq içün çoq ğayret köstermelimiz. Bunıñ içün birlik işi ve bu yönelişte er taraflı yardım içün Ukrain medeniy fonduna minnetdarım, – dep Qırımtatar Milliy Meclisiniñ başı Refat Çurabov qayd etti.

– Qavmiy Ukrainanen Qırımnıñ medeniy bağları ayırılmaz. Bizge berilecek leyhalarda bunıñ körünmesi de bizim içün pek müimdir. Aynı zamanda bizim içün bu musabaqa çerçivesinde prioritet – Azaq ve Qara deñizleri ögündeki topraqlarnıñ  medeniy – azaq ögündeki yunanlar, ahısqa türkleri, urumlar, rumeylerniñ, olarnıñ medeniyetiniñ ya da misal içün, aşlarınıñ çeşitligini saqlav, inkişaf etüv ve kösterüvdir. Milletlerimizge baqmadan biz – Ukraina vatandaşımız, siyasiy ukrainalılarnız, bir-birimizni destek etmelimiz. Tamam şimdi, bizim topraqlarımızğa ücüm etkende bunı köstermek pek müimdir, – dep Ukrain medeniy fondunıñ icra müdiri Vladıslav Berkovskıy ayttı.

LOTnıñ prioritetleri arasında – Qırımnıñ tamır halqlarınıñ, Azaq ve Qara deñizleri ögündeki topraqlarnıñ yekâne qavmiy halqlarınıñ sanatlarını rağbetleştirgen leyhalarnı destek etmek, sanat adları ve körünişleriniñ sayısını arttırmaq; Qırımnıñ, Ukrainanıñ Azaq ve Qara deñizleri ögündeki topraqlarınıñ taqmır halqlarınıñ yekâne medeniy mirasını saqlav ve raqamiyleştirüv tedbirlerini destek etmek, arbiy areketlerge yaqın olğan bölgelerde bulunğan obyektlerni raqamiyleştirmek ve tahliye etmektir.

Arizacınıñ leyha içün ala bilecegi grantnıñ parası – 700 biñden 3 millionğa qadar grivnadır. Ariza bermek içün soñ tarih – 2023 senesi saban (mart) ayınıñ 6-sı.

Kiçik (fevral) aynıñ 8-inde saat 16:00da LOTnıñ arizacıları içün vebinar olaraq. Ukrain medeniy fondunıñ You-Tube kanalında yayın keçirilecek.Bağlantığa basıp, “Tamır halqlarınıñ medeniyeti,  Azaq ve Qara deñizleri ögündeki topraqlarnıñ yekâne qavmiy medeniyeti” LOT aqqında tasfilâtlıca ögrene bilirsiñiz.