Qırımda “diversiya” ve “casuslıq” içün 16 Ukraina vatandaşı epis etildi

30 Yanvar 2023

“Ukrain diversiyacıları ve casuslarınıñ davaları” içün RFnıñ Ukrainağa tolu miqyaslı tecavuzından evel tutulğan eñ az 16 Ukraina vatandaşı epis etildi. Qırım uquq qorçalayıcı gruppasınıñ “2022 senesi Qırımda insan aqlarını ve halqara gumanitar uquqnıñ qaidelerini riayet etüvnen bağlı vaziyetni talil etüv” araştırmasında bu bildirildi.

Davanıñ iştirakçileri aralarında: Andriy Zahtey, Volodımır Dudka, Oleksiy Bessarabov, Dmıtro Ştıblikov, Hennadiy Limeşko, Leonid Parhomenko, Konstântın Davıdenko, Dmıtro Dolhopolov, Anna Suhonosova, Yunus Maşaripov, İvan Yatskin, Konstântın Şırinh, Halına Dovhopola, Vladıslav Yesıpenko, Yevhen Petruşın, Stanislav Stetsenko (Hudoley). RF TFH olarnı tutqanda “diversiya azırlamaları, silâ saqlamaları ve casuslıq etmeleri” içün qabaatladı. Şaatlıq itiraflarını almaq içün bu davalarda qanunsız taqiqat usulları ve işkencelerni qullanuv, qabaatsız prezumpsiyasını bozma, Rf TFHniñ rus KHV yardımınen “itiraf” videolarını tarqatuv vaqiaları qayd etildi.

Çiçek (aprel) ayınıñ 27-sinde Rostov-na-Donu şeerindeki makeme “qırımlı diversiyacılar davası”nıñ iştirakçisi Dmıtro Ştıblikovğa yañı üküm çıqardı – RF CQniñ 275. maddesi (Devlet hainligi) içün 19 sene ve 6 ay. 2021 senesi boş (noyabr) ayda makemeniñ evelki üküminiñ müddeti bitti, amma yañı sahte dava sebebinden Dmıtro Ştıblikov epishanede qala.

İlk qış (dekabr) ayında belli oldı ki, Aqyar şeerindeki “makeme”, RF CQniñ 275. maddesi (Devlet hainligi) içün 24 yaşındaki Yevhen Petruşınnı 12 senege maküm etti.

RF TFH, onıñ sanki “devlet sırrı ve Qara deñiz flotunıñ faaliyeti aqqında olğan bilgilerni toplap Ukraina mudafaa nazirliginiñ istihbarat baş idaresine yollaması” içün onı qabaatladı. 2021 senesi bozarğan (iyün) ayda Petruşın Aqyar şeerinden Moskvadaki SİZOğa ketirildi.