Qırım platformasına daa bir ülke qatılacaq

27 Yanvar 2023

İşğal aqqında “Qırım platforması”nıñ aytışmalar meydanına Kosta-Rika qatılacaq. Tış işleri naziriniñ ilk muavini Emine Ceppa bu aqqında haber berdi.

Bundan ğayrı diplomat qayd etti ki, bu platforma yardımınen Ukraina Qırımnı halqara kün mevzusını yañıdan yaptı ve bizim milliy menfaatımız eterafında ülkeler koalitsiyasını topladı.

– Böylece bu yekâne format, Avropa, Şimaliy ve Cenübiy Amerikalar, Asiya ve Afrikadan 60tan ziyde ülke ve halqara teşkilâtnı endi birleşti. Cian Cenübindeki ülkeler vastasınen Qırım Platformasınıñ kenişlemesi, bütün dünya içün Qırımnı işğalden azat etüv meselesiniñ pek müim olğanını tasdıq ete. Bugün Qırımnı işğalden azat etüv meselesi – tek bizim milliy menfaatımız degil, BMTnıñ Nizamnamesiniñ printsiplerinen razı olğan er bir ülkeniñ menfaatı da, – Ceppar yazdı.

2021 senesi avgust ayınıñ 23-ünde Kıyiv şeerinde Qırım platformasınıñi – Ukrainanıñ Qırımnı işğalden azat etüv meselesinde ilk aytışmalar meydanınıñ tesis sammit keçirildi.

Anda Qırımnıñ aneksiyası ve onı qaytaruv şartlarında nasıl areket etüv aqqında devletler arası orta qarar bergen  47 ülke ve halqara teşkilâtnıñ vekilleri iştirak etti. Bu vesiqa, yardımadanıñ ukrain olğanını, RFnıñ 2014 senesi Qırımdaki areketleriniñ tecavuz ve işğal olğanlarını tasdıq etti.