Ukrainada Qırımtatar tili milliy korpusı yaratılacaq

24 Yanvar 2023

Ukrainada Qırımtatar tili milliy korpusını yaratuv işi başladı.

Facebookta Prezidentniñ QMCde vekilligi bu aqqında haber berdi.

– QIRI’M YOUNG içtimaiy teşkilâtı, Qırımtatar tili milliy korpusı leyhası üzerinde çalışmağa başladı. Korpus – keniş malümat bazasınıñ (şu cümleden, metinlerniñ) talili vastasınen tilşınaslarğa tilni zemaneviy araştıruv aletidir, – beyanatta yazıldı.

Müessise bildirdi ki, leyhanıñ maqsadı – qırımtatar tiliniñ qullanılmasını kenişletmek ve onı araştırmaq ve inkişafını temin etmektir. Daa mezkür leyha, qırımtatar tiliniñ operatsiya sistemalarına ve online tercimanlara kirsetilmesine imkân berecek.

Arzu etken er kes malümat bazasını şekillendirmege ve leyha yerine ketirmege yardımcı ola bilir.

– Qırımtatar tili metinlerine (bediiy eserler, ilmiy maqaleler, stsenariyler, mektüpler v.b.) saip olsañız, bağlantığa basıp, olarnıñ sankkopiyalarını (ya da elektron metin faylları) yollañız, – dep müessise bildirdi.