Ruslarnıñ hırsızlağanı Geniçesk şeeriniñ sakinini Aqmescitteki yañı SİZOda tutalar

19 Yanvar 2023

İyün ayında hırsızlanğan Geniçesk şeeriniñ sakini Dmıtro Zaharov şu anda Aqmescitteki 2. SİZOda buluna.

İşğal etilgen Qırımdaki öz menbalarına atıf eterek “Qırım uquq qorçalayıcı gruppası” bu aqqında haber berdi.

Zaharovğa dair “mahsus cenk operatsiyasına qarşılıq kösterüvnen bağlı teşkerici tedbirler keçirile”.

QUGnıñ bildirgenine köre, dekabr ayınıñ başlanğıcından RF Mudafaa nazirligi iddia etti ki, sanki Zaharov “operatsiyağa qarşılıq” içün tutulğan kişiler cedvelinde olmay.

2022 senesi iyün ayınıñ 16-sında aqşam maalinde Geniçesk şeerinde rus askerleri Dmıtro Zaharovnı tuttılar.

 İyül ayınıñ 24-ünde rus medialarında malümat peyda oldı ki, Herson şeerinde TFH, sanki rus askerlerine UTHniñ emrinen beyanatlarnı yollağan adamnı tuttı.

Uquq qorçalayıcılarnıñ bilgilerine köre, Zaharovnıñ apayınıñ qırım tfhne hitabınıñ cevabında yazıldı ki, Dmıtro Zaharovnıñ areketleri teşkerile. O, “MAO keçirgen vaqıt rfnıñ telükesizligine zarar ketirmesi içün qabaatlana. Kişi, ayatqa ve sağlıqqa telükeden marum etilgen şartlarda buluna”.

2022 senesi oktâbr ayınıñ soñunda ukrain uquq qorçalayıcıları haber berdiler ki, Aqmescit şeerinde yañı SİZO açıldı. Rus akimiyeti bunı resmen bildirmedi.