İşğalciler Oleh Prıhodkonıñ apis müddetini uzattılar

18 Yanvar 2023

_{Foto: Gratı}

Rostov-na-Donudaki Voroşılov rayonı makemesi, 65 yaşındaki faalci Oleh Prıhodkonı makemege sayğısızlıq içün qabaatlı olaraq tanığan soñ onıñ apis müddetini bir ayğa uzattı.

Rus makemesi qarar berdi ki, “teraktnı azırlav” dava ceryanında Prıhodko, qabaat şaatlarını, şu cümleden Rusiye TFHniñ işçilerini, aqaaret etti. Beş senelik müddetke bir ay qoştı. 2022 senesi baarde olğanına baqmadan, tek şimdi belli oldı, dep “Gratı” haber berdiler.

2019 senesi oktâbr ayınıñ 9-ında TFHniñ işçileri, Qırımnıñ Saq rayonındaki Orihove qasabanıñ sakini Oleh Prıhodkonıñ evini ve patlayıcı şeyni tapqanları garajnı tintken soñ onı tuttılar. Qırımlı, terakt azırlaması ve patlayıcı şey yapması ve saqlanması içün qabaatladılar.

Taqiqatnıñ fikrine köre, Prıhodko Qırımnıñ akimiyetini “yarımadanı Ukrainanıñ terkibine keri qaytarmağa” mecbur etmek içün Saqnıñ memuriy binasını patlamağa istedi.

Prıhodko qabaatını red ete ve qayd ete ki, tintüv vaqtınca TFHniñ operativcileri evine “deliller”ni köterip-köterip attılar. O bildire ki,  öz ukrain taarflı cemaat ögündeki nazar noqtası içün onı taqip eteler.