rusiyeniñ topraqlarına ateşler “daa teren” olacaq – İstihbarat baş idaresi

05 Yanvar 2023

_{Foto: ABC New}

Ukraina Mudafaa nazirliginiñ İstihbarat baş idaresiniñ reberi Kırılo Bıdanov tüşüne ki, rusiyeniñ topraqlarına mümkün olacaq ateşler “daa teren” olacaq.

ABC Newske intervyü bergende bunı bildirdi, Ukrinform haber berdi.

Bilgilerge köre, Budanovğa Ukrainanıñ ukrain sıñırından 1200 kilometrlik uzaqlıqta bulunğan “Enhels” rus uçaq bazasına ateş açıp-açmağanını sorağanda o qayd etti ki, “tek cenk bitecek soñ” bu sualge cevap bere bilir.

Aynı zamanda MNniñ İBİniñ başı kelecekte bu tür ateşlerniñ daa çoq olıp-olmaycağını sorağanda şunı cevap berdi: “Tüşünem ki, ebet” – ve qoştı ki, olar “daa teren” olacaq.

rusiyeniñ qanunsız olaraq işğal etkeni Qırımğa ateşlerge dair Budanov şunı ayttı: “Qırım – ukrain toprağı, biz öz toprağımızda er bir silâ qullana bilirmiz”.

O fikrini bildirdi ki, mart ayında eñ sıcaq küreşmeler başlaycaq. Onıñ sözlerine köre, baarde Ukraina büyük bir ücüm azırlana.

– Bizim maqsadımız – ve onı ireşecekmiz – halqara uquqlarnıñ bütün subyektleriniñ tanınğanları 1991 senesindeki Ukrainanıñ sıñırlarına qaytmaqtır, – dep Budanov ayttı.

Bundan ğayrı, MNniñ İBİniñ reberi qayd etti ki, rusiyeniñ silâsı az olağanı içün iranlı Shahed dron-kamikadze kibi daa “ucuz” silâ qullanmağa başladılar.

rusiyeniñ kelecegi aqqında laf etkende Budanov bunıñ bir qaç yolu olğanını bildirdi. Aynı zamanda ayttı ki, “rusiyeniñ deñişmesinden qorqmamaq kerek – bu da bütün dünya içün faydalı olacaq”. 

– rusiye dünya içün endi arbiy bir telüke olmay, bu bir masaldır, – dep qoştı.

İBİniñ reberiniñ sözlerine köre, qalğan tek bir mesele – rfnıñ özek silâsı mağazı ve “bütün dünyanıñ rusiyeni özek silâsından marum etmek ya da eñ az onıñ özek silâsına halqara nezaretke kerekligini añtmasına” imkân berecek “kontrol etilmege rejimi”dir.

Mudafaa nazirliginiñ İBİniñ bildilerine köre, rusiye cenkni bitirmege planlaştırmay ve 2023 senesi ücüm areketlerini yapmağa devam etecek.