Budanov: Bizim bölüklerimiz Qırımğa silânen kirecekler

26 Dekabr 2022

Mudafaa nazirliginiñ İstihbarat baş idaresiniñ reberi Kırılo Budanov bildirdi ki, Ukraina Qırımnı «bir qaç usulnı birleştirip» qaytarcaq. Qırım.Aqiqat bu aqqında yazdı.

– Bİr qaç usulnı birleştirip, Qırımnı qaytaracaqmız: em küç, em de diplomatiya vastasınen. Amma küç olmadan iç bir şey olmaycaq. Bizim bölüklerimiz o yerge silânen kirecekler, – dep Budanov ayttı.

O inandırdı ki, Ukraina bütün ğayıp olğan topraqlarını qaytaracaq.

– Ukraina, tanınğan 1991 senesi sıñırlarda bir devletttir. Bunen razı olmağanlar, Ekinci cian cenki bitken soñ yaratılğan dünya nizamınen ve BMTnıñ yañı qaidelerinen razı olmay, – dep qayd etti.

2023 senesi yaz mevsiminde ne yerge keteyim dep sualge İBİniñ reberi şunı ayttı: «Qırımğa ketmege tavsiye etem. Bu, çoqtan ukrain turistlerini beklegen Ukrainanıñ incisidir».

Oktâbr ayınıñ 1-inde ukrain arbiy istihbaratınıñ başı bildirdi ki, 2023 senesi baar mevsiminiñ soñuna qadar Ukraina Silâlı Quvetleri Qırımğa kirecek.