Ukraina, Hansaraynı viran etüv sebebinden UNESCOğa muracaat etti

19 Dekabr 2022

Rusiye, Qırımda qırımtatarlarnıñ bar olmasınıñ delili olğan Bağçasaraydaki Hansaraynı viran ete. Bunıñ içün Ukraina medeniyet naziri Oleksandr Tkaçenko UNESCOğa muracaat etti, dep zaxid.net haber berdi. UNESCO – medeniy mirasnı saqlamağa vaazifeli olğan teşkilâttır.

Nazir hatırlattı ki, Bağçasaraydaki Hansaray – bu topraqlarda qırımtatarlarnıñ bar olması, inkişafı ve etnogenezini saqlağan yekâne qırımtatar tek mimuriy abidesidir.

– İşğalciler onı viran eteler. Olar, Altın iş odasınıñ renkli cam resimleri ve damını bozalar, eski damını yañı zemaneviy qurucılıq mazlemelerine deñiştireler. Yani milliy abideni yañı inşa vastasınen yoq eteler. Biz UNESCOnıñ diqqatını onıñ daimiy azasınıñ printsipleri ve areketlerine daa bir kere çekemiz, – dep Tkaçenko yazdı.

Keçenlerde tış işleri naziriniñ muavini Emine Ceppar aynı mevzudan UNESCOğa muracaat etti.

Qayd etemiz ki, keçkende Hansaraynıñ ilk körünişi deñiştirildi. 1736 senesi feldmarşal Burhad Minih asıl Hansaraynı yaqtı. Aynı zamanda Qırım hanlığınıñ arhivi de yoq etildi. Bundan soñ o bir qaç kere yañıdan quruldı. Qırımtatar ustalarınıñ yapqanları bu qurucılıq işleri, muayyen vaqıtqa qadar, asıl dep tüşünmek mümkün. Soviet vaqtında, qırımtatarlarnıñ sürgünliginden soñ saray çoq zarar kördi.