Ruslarnıñ tutqanı Geniçesk şeeriniñ sakini Dmıtro Zaharov Qırımda buluna – uquq qorçalayıcılar

02 Dekabr 2022

Vaqtınca işğal etilgen Qırımda Geniçesk şeeriniñ sakini Dmıtro Zaharov buluna. İyün ayında tecavuzcılar onı alıp tuttılar. Qırım uquq qorçalayıcı gruppası bu aqqında haber berdi.

– İyün ayında tutulğan Geniçesk şeeriniñ sakini Dmıtro Zaharov şu anda Qırımda buluna, faqat rf mudafaa nazirligi inandıra ki, o “operatsiyağa qarşılıq köstermesi” içün tutulğanlar aralarında olmay.

Bildirildi ki, iyün ayınıñ 16-sında aqşam maalinde Geniçesk şeerinde aşayt tükânı yanında rus tecavuzcıları Dmıtro Zaharovnı alıp tuttılar.

Bundan soñ rus propaganda medialarında, telükesizlik federal hızmetiniñ bir erkekni tutqanı aqqında malümat peyda oldı. Adam, Ukraina telükesizlik hızmetiniñ emrine köre, rf askerlerine beyanatlarnı sanki yollay edi.

Bir video da peyda oldı. Anda Zaharov añlata ki, deñizde qanunsız olaraq sanki balıq tuta ve bunı UTH saqlay edi. Bu videoda Zaharov ayta ki, mahsus hızmetniñ bu işçisi, tahminen 500 rus askeriniñ telefon nomerasını sanki yolladı. O ise bu nomeralarğa “rus askeri, teslim ol, ailesi aqqında tüşün, ayatını qurtarmağa yardımcı olacaqmız” kibi beyanatnı yolladı.

“Qırım uquq qorçalayıcı gruppası”nıñ yazğanına köre, Zaharovnıñ apayınıñ qırım tfhne hitabınıñ cevabında yazıldı ki, Dmıtro Zaharovnıñ areketleri teşkerile. O, “mao (mahsus arbiy operatsiya – yani rusiyeniñ Ukrainağa qarşı cenki – muarrir) keçirgen vaqıt rfnıñ telükesizligine zarar ketirmesi içün qabaatlana. Kişi, ayatqa ve sağlıqqa telükeden marum etilgen şartlarda buluna”.