Mustafa Cemilev Türkiye migratsiya idaresiniñ reberinen körüşti

01 Noyabr 2022

Qırımtatar halqınıñ lideri, Ukrainanıñ halq mebusı Mustafa Cemilev Ankarada Türkiye migratsiya idaresiniñ reberi Savaş Ünlünen körüşti.

QIRIM.News malümat agentliginiñ türk bölüginiñ haber bergenine köre, körüşüv vaqtında Ukrainadan kelgen ve fevral ayınıñ 24-ünden soñ Türkiyede yerşelken qaçaqlarnıñ vaziyeti, qırımtatarlarğa uzun yaşama ve çalışma aqlarını berüv muzakere etildi. 

Körüşüvde Ukrainanıñ arab ve musulman devlerlerinen işdeşligi mesleat şurasınıñ kâtibi Snaver Seithalil, Qırım Milliy Varlıq Fondunıñ prezidenti Lenur Mambetov, Türkiye migratsiya idaresiniñ ecnebiy meseleleri baş müdiri Gözde Özkorul ve Qırım Haber Agentliginiñ türk bürosınıñ baş müarriri Esma Kasar iştirak ettiler.

Cemilev, Ukraina vatandaşlarına mesken bermesi, vaqtınca qorçalaması ve qırımtatarlarğa uzun yaşama vesiqasını bermesi içün Türkiyege teşekkür bildirdi.