İşğalciler Qırımda mobilizatsiyanıñ ekinci dalğasını azırlaylar – Çubarov

06 Oktâbr 2022

İşğal etilgen Qırımda mobilizatsiyanıñ ekinci dalğası azırlana. Apostrof TVnıñ canlı yayınında Meclisniñ başı Refat Çubarov haber berdi, dep “Apostrof” internet-neşiri yaza.

– Şimdi mobilizatsiya malümatnameleri faal olaraq berile. Keçenlerde Qırımnıñ farqlı yerlerinden çeşitli beyanatlar aldıq. Olarnı talil etip Qırımda mobilizatsiyanıñ ekinci dalğasınıñ azırlanması belli oldı. Bu bizim içün pek aşkâr, bunıñ içün o mobilizatsiya malümatnameleriniñ insanlarnı sanki yatıştırmalı olğan çeşitli sebepleri yazılğan. Vesiqalarıñıznı teşkermek içün dep keliñiz, – dep Çubarov ayttı.

O qayd etti ki, birinciden işğalciler qırımtatarlarğa qarşı mobilizatsiya tedbirlerini keçireler. Biñlerce insan rusiye federatsiyasınıñ yapqanı halqara cinayetniñ iştirakçisi olmamaq içün Qırımdan çıqtı.

– Pek yazıq ki, bugün ukrain ükümeti bu insanlarğa açıq aydın añlatmalar bermedi. Olarnıñ qıtaviy Ukrainağa nasıl keteceklerine dair. Bu da Qırımdaki allarğa pek tesir ete. Bazı aileler çetin ümütsizlikten keri qaytalar, anda olarnıñ aqaylarını – bundan da pek qorqam – mahsus bir ceza bekley. Bunıñ içün biz tırışamız ki, Ukraina ükümeti yaqın kelecekte böyle adımlar yapar ki, insanlar Prezident Volodımır Zelenskıynıñ, Qırımtatar Milliy Meclisiniñ mobilizatsiyadan qaçınma çağıruvlarına cevap bergende özlerini terk etilgen duymasınlar, – dep Çubarov ayttı.