Meclis, öldürilgen qırımtatar askeri Rustem Ablâtifniñ ailesine acına

30 Sentâbr 2022

Elvida, Rustem bey!

rusiyeniñ başlağanı Ukrainağa qarşı tolu miqyaslı tecavuznıñ şiddetli acı ve yaqıcı kederi er vaqıt ayatlarnı alıp tura.

2022 senesi sebtâbr ayınıñ 27-sinde Herson yönelişinde şiddetli duşmannen küreşlerde vatandaşımız Rustem ABLÂTİFOVnıñ öldürilmesi aqqında facialı haber bizim içün şaşırılğan oldı.

Rustem bey tek tanınğan tarihçı, alim, sisiyasetşınas degil edi. O, ilmiy ve areketçen faaliyeti vaqtında ana Qırımnıñ ve umumen Ukraina devletiniñ inkişafı ve abadanlığı içün çoq şey yaptı. ‘Qırımtatarlarnıñ tarihiy Vatanına qaytuvı ceryanında Türkiyedeki Qırım diasporası (1980 seneleriniñ soñu – 2000 seneleriniñ başlanğıcı)’ adlı dissertatsiyanı qorçalap, Tarih saasında ‘felsefe ilmi doktorı’ olğan soñ da öz halqı, ana Qırım ve Ukraina devleti içün çalışmağa devam ete edi.

O mert ve iradeli, öz soyınıñ qıymetli devamcısı edi, zorluqlar sebebinden qolları üzülmey edi. 2014 senesi rusiye Qırımnı işğal etken soñ Terrorğa qarşı operatsiyada göñülli asker olaraq cenklemege ketti. 2022 senesi fevral ayınıñ 24-ünde rus duşman Ukrainanıñ bütün topraqlarını zapt etmege tırışqanda sadıq Ukraina vatandaşı olaraq Rustem bey iç tüşünmeyip ana Vatanına qaraman olaraq qorçalamağa ketti.

Ukraina devletini ve epimizni qorçalağanda öz ayatını bergen ukrain askeri – qırımtatarğa ebediy şan-şüret olsun!

Qırımtatar Milliy Meclisi qaramannıñ aqrabalarına ve yaqınlarına açıq göñülden taziye bildire. Rustem ABLÂTİFOVnıñ aqrabaları, işdeşleri, arqadaşları, fikirdeşleri, qardaş kibi askerlerine, onı pek yahşı bilgen ve ürmet etkenlerge teselli sözlerni tapmaq soñ derecede zor. Rustem bet aqqında aydın hatıralar er vaqıt yeüreklerinde qalacaqtır.

Qaramanğa şan-şüret olsun!

Allah rahmet eylesin!

Qırımtatar Milliy Meclisiniñ azaları

Qırımtatar halqınıñ Qurultayınıñ vekilleri