Meclisniñ Koordinatsiya merkezi tek Qırımdan kelgenlerge yardım etmey

19 Sentâbr 2022

Qırımtatar Milliy Meclisiniñ gumanitar meseleler koordinatsiya merkezi mümkün olğan çoq ortaq çekmege tırışa. Şu anda Türk işdeşligi ve kooridntasiya agentligi (TİKA) esas ortağı qala. Meclisniñ başı Refat Çubarov QIRIM.Newske tefsir etkende bunı bildirdi. Onıñ sözlerine köre, Koordinatsiya merkezi em de Avropa teşkilâtları ve ülkelerinen işdeşlik yapa.

– Mümkün olğanımızğa qadar yardım etmege tırışamız: ilâçlar, yaşayış eşyaları, himiya, aş mahsulatları meselelerinde. Biz tek qırımtatarlarğa, Qırımdan kelgenlerge degil, em bala poliklinikaları, onkologiya hastalarınıñ yatqanları hastahaneler kibi mashuslaştırılğan müessiselerge yardım etmege tırışamız, – dep añlattı.

TİKAdan Merkezge maşnanıñ berilmesi aqqında laf etkende o, bu ediyeniñ vaqtında berilmesini qayd etti.

– Bu yardımnı tek Kıyivge ve vilâyetine degil, em de Ukrainanıñ başqa vilâyetlerine yollamaq bizim içün pek müimdir. Bu ediyeler çoq vaqtındadır ve biz daa semereli çalışaycaqmız,– dep ayttı.

Keçenlerde Türk işdeşligi ve kooridntasiya agentligi (TİKA) yardımınen türk ükümeti gumanitar yardımnıñ taşınması içün Mecliske bir maşna berdi.