Qırımnıñ reintegratsiyasına azırlıq işleri başlandı

08 Sentâbr 2022

Resim: krymsos

Qırımnı işğalden azat etme ve yañıdan integratsiya etme strategiyasını yerine ketirmeniñ çerçivesinde ve Ukraina Prezidentiniñ emrine mücibi Vekillikniñ esasında Qırım Muhtar Cumhuriyetiniñ ve Aqyar şeeriniñ topraqlarını işğalden azat etken soñ Ukraina devlet organlarınıñ ilk areketler planını azırlama iş gruppasınıñ ilk tesis toplaşuvı keçirildi.

Gruppanıñ faaliyetiniñ maqsadı – işğalden azat etilgen Qırım yarımadasınıñ tamamınen reintegratsiyası içün şarait yaratacaq esas qararğa dair teklifler bermektir.

– Qırımnıñ rentegratsiyasını acele tarzda başlatmaq içün işğal etilgen yarımada tübünde kontrolımız yañıdan tiklengen soñ devletniñ ilk areketlerini endi bugün tüşünip azırlamaq kerek. Gruppanıñ işine, bu meselelerde büyük tecribesine saip olğan milliy ve halqara eñ ihtisaslı mütehassıslarnı çekmege planlaştıramız, – dep Daimiy Vekil Tamila Taşeva qayd etti.

İş gruppasınıñ faaliyetiniñ esas saaları:

• em arbiy, em insaniyetke qarşı cinayetler yapmaq, em de işğal memuriyetleriniñ işine yardım etmek içün mesuliyet meselesi;
• işğalden azat etilgen Qırım MC ve Aqyar şeerinde halq ögündeki akimiyetni yañıdan yaratmaq;
• işğal etilgen topraqta berilgen vesiqalar ve makemeniñ qararlarınıñ verifikatsiyası;
• mülkiyet aqqını qorçalamaq, bu cümleden işğal etilgen topraqlarda yapılğan devlet, kommunal ya da şahsiy ğayrı menkul mallarına dair cinayetlerniñ konvalidatsiyası;
• Qırım işğal etilgen soñ topraqlarına kelgen rf vatandaşlarınıñ kelecek taqdirini tesbit etmek;
• işğalden azat etilgen topraqlarda gumanitar siyaset.

Gruppanıñ neticesi ukrain devlet akimiyetiniñ organlarına işğalden azat etilgen Qırım yarımadasınıñ muntazam reintegratsiyasını temin etmek içün ilk adımlarğa dair tekliflerni şekillendirmek olacaq.