Zelenskıy, Ukrainanıñ arab ve musulman devletlerinen işdeşligi meseleleri mesleat şurasınıñ terkibini tasdıqladı

05 Sentâbr 2022

Devletniñ başınıñ emrinde yazılğanına köre Şura, Ukraina Prezidenetiniñ mesleat-muşavere organı olacaq.

Bu cümleden, Mesleat şurasınıñ terkibine üç qırımtatar: Ukraina halq mebusı, Mesleat şurasınıñ vekili Rustem Umerov, «’Qırım milliy varlıq fondu’ halqara hayriye fondu» hayriye teşkilâtınıñ idaresiniñ azası, Mesleat şurasınıñ kâtibi Snaver Seithalilev ve Qırımdaki musulmanlarnıñ maneviy idaresiniñ başı Ayder Rustemov qatıldı.

Mesleat şurasınıñ esas vazifeleri arasında arab ve musulman devletleriniñ Ukrainağa yatırımlarını azırlamaq, yerine ketirmek ve çekmek yollarını inkişaf etmek; Mesleat şurasınıñ kompetentsiyalarına ait olğan meselelerge dair Ukraina qanun leyhalarını, Ukraina Prezidentiniñ aktlarını azırlav ceryanına dair teklif etmek; arab ve musulman devletleri aralarında Ukrainanıñ pozitiv imiciniñ şekillenmesine yardım etmektir.