Qırımtatar Milli Meclis Reisiniñ Yılbaş bayramı munasebetinen hayırlavı

Qıymetli semetdeşler!

Ürmetli vatandaşlar!

2017 senesi soñki saatlerni saymaqta. Bu yıl vaqıtınca işğal etilgen Qırımnıñ ve qırımtatar halqınıñ tarihında şerefnen berilgen imtianlar, onlarca boysunmağan qırımtatar ve ukrayin siyasiy mahbüsler, rus işğalcileri ketirgen repressiyalar ve basqıncılıqqa qarşı öz saflarını daa ziyade toplağan qırımtatar halqınıñ cesürligi ve birligi ile hatıralarda qalacaq.

Biteyatqan 2017 senesinde biz epimiz rus işğalcileri tarafından zindanlarğa atılğan siyasiy mahbüslerniñ balalarını diqqat ve hususiy qayğıruv ile qucaqlamağa areket ettik. Qırımtatar halqı iç bir vaqıt, kendi milletiniñ kelecegi içün öz canlarını ve azatlığını feda etken semetdeşlerimizniñ qorantalarını müsibette yalıñız qaldırmadı ve qaldırmaycaq. 

Biz, ayrıca, yaqınlarımız, qomşularımız ve dostlarımıznıñ evlerine kelgen belâlarda ve matemlerde birlik içinde olarnen beraber oldıq. Yüce Yaratıcığa oqulğan dualarımızda, keçmişlerniñ günahları afu etilsin ve olarğa rahmet kösterilsin, dep niyaz ettik. 

Biz, basqıncılarnıñ mahkemelerine kelip, siyasiy mahbüslerimizge qol tutqan semetdeşlerimizniñ curatı ve birdemliginen ğurur duydıq. 

Yañı qorantalarnıñ quruluvı, ve evlâtlarnıñ doğuluvı aqqında haber alğanda ortaq quvanç issettik. Er bir yañı qırımtatar qorantasına tınçlıq, amanlıq ve quvanç, sabiylerge ve ana-babalarına ise öz Vatanında, rus işğalcilerinden azat etilgen Qırımda uzun ve bahtlı ömür tileymiz. 

2017 senesinde Qırımtatar Milliy Meclisniñ halqara siyasiy faaliyeti, Qırımnı zapt etken Rusiyeniñ üzerine milletlerara iqtisadiy ve uquqiy tazıyıqnıñ artması maqsadınen alıp barıldı. 

Qırımtatar halqınıñ milliy lideri Mustafa ağa Cemilev, Qırımtatar Milliy Meclisniñ Reisi ve azaları onlarca halqara körüşüvler ve ziyaretlerni kerçekleştirdi. Olar Birleşken Milletlerniñ Havfsızlıq Şurası, Tamır halqlarnıñ işleri boyunca BMT Daimiy forumı, Avropa Şurası Nazirler komiteti, PACE, PABSEC, PA OSCE kibi teşkilâtlarnıñ toplaşuvlarında iştirak etip, öz maruzalarını taqdim ettiler. 

Qırımtatar cemaat ve uquqqoruyıcı teşkilâtlarnıñ temsilcileri bir sıra halqara konferentsiyalar, simpoziyumlar ve diger tedbirlerni alıp bardılar. 

Bütündünya Qırımtatarları Kongressinde birleşken qırımtatar diasporasını temsil etken teşkilâtlar da faal sürette areket ettiler. 

Milletlerara qoltutuvğa dayanğan Ukrayina devletiniñ ğayretleri sayesinde ve Qırımtatar Milliy Meclisniñ, qırımtatar diasporasınıñ, qırımtatar teşkilâtlarnıñ maqsatlı faaliyeti neticesinde Qırımnıñ azatlıqqa qavuşması ve Ukrayinağa topraq bütünliginiñ qaytarılması qaçınılmaz körülmekte. 

Ukrayina açqan davada BMTniñ Halqara mahkemesi tarafından qabul etilgen ara qarar rus işğalci akimiyetni, Qırımtatar Milliy Meclisniñ faaliyetine ketirilgen yasaqnı lâğu etmege mecbur ete. Ayrıca, Meclis yolbaşçıları ve azaları içün Qırımğa serbest kiriş içün ve ileride insan aq-uquqlarını sıñırlamamaq içün emir etmekte.  

Qırımtatar Milliy Meclisniñ muavinleri İlmi Ümerov ve Ahtem Çiygozniñ azat etilmesinen bağlı quvançımız yanında, Qırımda hapiste bulunğan onlarca semetdeşimiz ve azap çekken qorantalarınıñ qıyın vaziyetlerinen bağlı accı keder de bar. 

Aynı vaqıtta, 2017-niñ dekabr ayında Kyivde alıp barılğan hatıra tedbirleri, Ukrayina devleti qırımtatar halqınıñ hatırasına köstergen aqiqiy ürmetniñ alâmeti oldı. Qırımtatar halqı Birinci Qurultayınıñ 100 yıllığı munasebetinen Ukrayina Yuqarı Şurasınıñ tantanalı toplantısı, Ukrayina Merkeziy Bankı çıqarğan hatıra parası, mevzunen bağlı poçta markalarnıñ ve zarflarnıñ çıqarılması, sergilerniñ keçirilmesi ve mahsus filmlerniñ azırlanması – ukrayin cemiyetniñ yaşayışında közge körüngen vaqialar oldı. 

Ukrayina Anayasasınıñ “Qırım muhtar cumhuriyeti” serlevalı 10-ncı bölügine kirsetilecek deñişüvler ve ilâvelerni azırlav işi 2017 senesiniñ mayıs aynıda başladı ve endi soñuna yaqınlaştı. İş gruppasınıñ azaları ve mütehassıslar tarafından Ukrayina Anayasasına kerekli deñişüvler leyihası azırlandı. Eñ yaqın zamanda işbu leyiha başta Anayasa komissiyası, soñra ise Ukrayina Yuqarı Şurasınıñ baquvına taqdim etilmesi közde tutula.

Qırımtatar halqınıñ özünniñ tarihiy vatanından kendi kendini idaresinen bağlı aqqı yerine kelmesi içün elimizden kelgenini yapacaqmız. Bu aqqnıñ şekili em Qırımnıñ tamır halqı – qırımtatarlarnıñ beklentilerine, em de Ukrayin devletiniñ menfaatlerine uyğun olması içün bar ğayretimizni kösterecekmiz.   

Aziz semetdeşler

Ürmetli vatandaşlar!

Öyle vaqıt kelecek ki, evlerge yapılğan deşetli basqınlar, aşşalayıcı tintüvler, qanunsız tevqifler ve mahkemeler, Qırıtatar Milliy Meclis ve yerli meclis azalarınıñ, Milliy areket faalcileri ile musulmanlarnıñ taqibi keçmişte qalacaq. 

Biz epimiz mutlaqa tekrar quçaqlaşıp, Qırımda birleşecekmiz. 

Lâkin epimiz şeref ve birlikni qorçalap, rus işğalcileriniñ Qırımnı “siñdirme”nen bağlı sahte areketlerine izin bermemelimiz. Bu munasebetnen, Qırımda basqıncılar teşkil etken qanundan tış er çeşit saylavlarda iştirak – bahis mevzusı bile degil. 

2018-niñ mart 18-inde iç bir qırımtatarı, iç bir ukrayin, iç bir şuurlı insan, milleti müim degil, Rusiye tarafından vaqıtınca işğal etlgen Qırımnıñ saylav uçastkalarında olmamaq kerek. 

Qırımtatar Milliy Meclisniñ adından kelecek 2018 yılında er biriñizge ve cümleden epimizge eminlik, quvet ve iradeni tileyim! 

Er bir evde tınçlıq ve amanlıq üküm sürsin ve bereket artsın! 

Yüce Yaratıcı epimizni qorçalasın ve ömürimizde doğru yolnı köstersin.  

Yañı, 2018 yılı hayırlı olsun! 

Refat Çubarov,

Qırımtatar Milliy Meclisniñ reisi

Kyiv, 31 dekabr, 2018s.