OBSEC Parlament birleşmesiniñ 49-ncı toplaşuvı

05 Iyül 2017

Bugün İstanbulda OBSEC (Qaradeñiz İqtisadiy İşbirliği Teşkilâtı) Parlament birleşmesiniñ 49-ncı toplaşuvı öz işine başladı.

Yañı azalarnıñ mandatlarını qabul etüv esnasında Ukrayina delegatsiyasınıñ ğayretinen bir rus vatandaşnıñ namzeti lağu etildi. Pavel Şperov adlı bu vatandaş Rusiye Duması tarafından Assambleyanıñ erkânına kirsetilmege istedi. Aqyar (Sevastopol) sakini olğan Şperov, yaqında Qırımda qanundan tış olaraq keçken Rusiye Duması saylavlarında Aqyarda ğalebe qazandı.

Ukrayin deputatlarnıñ, hususan Liudmyla Denysova (Narodnyi Front fraksiyası) ve Refat Çubarov (BPP fraksiyası), qani etici çıqışları ve ketirilgen şeksiz delilleri, Ermenistandan ğayrı butün iştirakçiler tarafından tekmil destek kördi.

Milli Meclisniñ reisi Refat Çubarov bildirgenine köre, Şperov vatandaş Qaradeñiz İqtisadiy İşbirliği Teşkilâtı Parlament birleşmesiniñ toplaşuvını terk etip zaldan çıqıp ketmege mecbur oldı.