Mustafa Cemilevniñ Türkiyedeki diplomatlarnen körüşüvleri

05 Iyül 2017

İyül 4 künü Qırımtatar halqınıñ yetekçisi, Ukrayina Prezidenti yanında qırımtatar halqınıñ meselelerinden mesül Mustafa Cemilev, Türkiye Cumhuriyetini ziyareti çerçevesinde Hariciye işleri nazir muavini Ahmet Yıldız ile körüşti. Körüşüvde ayrıca Kavkaz, Orta Asiya, ve Şarqiy Avropa departamentniñ müdürü, diger bölüklerniñ reberleri Emre Özkan ile Fatih Öztürk ve Mustafa Cemilevniñ mesleatçısı Rustem Umerov ile Milli Meclis Reis Hızmetiniñ reberi Arsen Jumadilov da iştirak ettiler.Nazir muavini Ahmet Yıldız, bu künleri Cenevada Qıbrısnen bağlı muzakerelerge qoşulğan Hariciye naziri Mevlüt Çavuşoğlu adından aliy musafirlerni selamladı ve Türkiye tarafından Ukrayina topraq bütülügininiñ desteklengenini tekrar tasqiqladı. Ahmet Yıldız ayrıca, türk gemilerniñ Qırım limanlarına qanundan tış kirişlerini toqtatmaq içün kerekli tedbirlerni alğanını qayd etti. 

Mustafa Cemilev öz nevbetinde, böyle mürekkep zamanda çeşitli halqara tögerek ve çevrelerde Ukrayinağa kösterilgen destekten sebep nazirlikke teşekkür bildirdi. Öz qonuşmasında o, işğal etilgen Qırımda insan aq-uquqlarınen bağlı şimdiki vaziyet aqqında ikâye etip, Kremlniñ siyasi mahpuslarınıñ aqlarını bozuv vaqıalarına diqqat çekti. 

Bundan başqa qırımtatar halqınıñ yetekçisi, Qırımnıñ işğalini aqlamaq içün Rusiye tarafından halqara ve devletlerara munasebetlerni qullanuv ğayretlerinen bağlı öz endişelerini seslendirdi. Onıñ fikirince, Türkiye-Rusiye parlament gruppasına Qırım adından Rusiye Dumasına saylanğan “deputatlarnıñ” kirsetilmesi qabul etilmez bir vaziyet. Aynen böyle maqbul olmağan diger husus – Dumadaki Aqyar “deputatınıñ” OBSEC Parlament birleşmesi terkibine qoşuluvı. 

Körüşüv esnasında qırımtatar halqınıñ yetekçisi, Türkiyede faaliyet köstergen sahte qırımtatar teşkilatlarğa ayrı emiyet berip, Türkiye Cumhuriyeti vatandaşı Ünver Selniñ açıqtan Rusiye menfaatine iş alıp barğanını ve Rusiye tarafından destek körgenini añlattı. 

Türkiye ziyareti programması boyunca Mustafa Cemilev ayrıca Türkiyedeki Ukrayina ve Poloniya Büyükelçileri Andriy Sybiga ve Maciej Lang ile körüşüvler keçirdi. Subetdeşler işğal etilgen Qırımda insan aq-uquqlarınen bağlı vaziyetni muzakere ettiler ve rus propagandasınıñ Türkiyedeki kütleviy haber vastaları üzerindeki tesirine ayırı diqqatni çektiler. Taraflar, evelâ Türkiye olmaq üzre keñ ecnebiy diplomatik çevrelerde, qırımtatar halqınıñ meselelerini temsil ve muzakere etme kibi tedbirlerniñ keçirilüv imkânları boyunca belli qararlar aldılar.