Marek Siwiec ile körüşüv

27 Iyün 2017

26 iyünde Qırımtatar Milliy Mecliste Meclis reisi Refat Çubarov ile “Holocaust Memorial Center “Babiy Yar” vaqufnıñ yolbaşçısı Marek Siwiec ile körüşüv olıp keçti. Vaqufnıñ maqsadı – tarihte yer alğan facialar aqqında doğru bilgilerni darqatmaq ve olarnıñ kelecekte tekrar meydanğa kelmemesi içün ğayret köstermek. Marek Siwiec aytqanına kore, bu mevzunen bağlı tarihiy numayışnı azırlamaq içün şimdiki vaqıtta mahsus halqara ilim adamları gruppası teşkil etildi.

Meclis reisi öz nevbette qayd etkenine köre, tarihiy vaqialar arasında sıqı bağlar bar. “Bütün bu cinayetler – Holodomor, Holokost, Sürgünlik – epsiniñ tamırı bir”, – dedi Refat Çubarov. O ayrıca, qurulacaq memorialda 20-nci asırda meydanğa kelgen bütün facialı adiselerni umumiy olaraq aydınlatmağa teklif etti. Çünki bugün Rusiye, tarihnı, ve hususan Ekinci Cian cenkniñ tarihını ğayırdan yazıp çıqarmaq peşinde, aqiqiy insaniy degerlikler yerine bir taqım suniy esaslar işlep çıqarmaq, evel zamanlarnıñ cinayetçi ve qatillerni qaraman olaraq köstermek niyetinde.

Subetdeşler mezkür leyihanıñ ömürge keçirilüvi içün ileride işbirlik hususında ortaq qararğa keldiler.

Körüşüvde Qırımtatar Milli Meclisniñ azaları – Gayana Yüksel ve Eskender Bariyev ile beraber Milliy Areketniñ veteranı Sinaver Qadırov da iştirak ettiler.