Nariman Celâl: Qırımtatar halqınıñ lideri Mustafa Cemilevge Qırımğa kirişni yasaq etmek – Rusiye akimiyeti tarafından qırımtatarlarğa nisbeten etilgen bir toqattır

25 Yanvar 2015

Rusiye Federatsiyasında Moskvanıñ Basman mahkemesi yanvar 22 künü, Mustafa Cemilevniñ Rusiyege kirişni beş yılğa yasaq etken Rusiye Federal migratsion hızmetine davası boyunca planlaştırılğan toplaşuv keçirilmesini fevral 12-ne qaldırdı.

Mustafa Cemilev mahkemeden ğalip çıqacağına inanmasa da, atta böyle vaziyet oña Qırımğa qaytmağa yardımcı ola bilecegini tüşüne.

Qırımtatar Milliy Meclis reisiniñ muavini Nariman Celâl Mustafa Cemilevniñ vaziyeti mahkeme qararlarına bağlı olmağanından ve Cemilevge Qırımğa kirişi yasaq etilmesiniñ siyasiy negizi bar olganından emindir. Onıñ fikrine köre, işbu yasaq yarımada tamır halqı içün ciddiy bir toqattır.

«Qırımtatar halqı içün Mustafa Cemilev aqiqiy bir yetekçi ola. Yalıñız öz halqında degil de, bütün dünyada belli olğan bir insandır. O, böyle munasebetke, şüretke kerçekten de lâyıqtır. Mustafa Cemilevge kirişi onıñ ayırı areketleri ya da sözleri ile bağlı olmağanından şübemiz yoqtır. İtibarlı insan, Sovet birligi kibi devlette dissident olğan, halqınıñ aqları oğrunda ve sovet totalitar ya da avtoritar rejimine qarşı küreşken insan nasıldır bir devlet tarafından böyle munasebetke lâyıq degildir», – dey Nariman Celâl.

Meclisniñ reis muavini aytqanı kibi, bugün Cemilevniñ yaşdaşı olğan semetdeşleri, em de gençler içün qırımtatarlarnıñ avdeti oğrunda küreşi pek emiyetlidir, Mustafa Cemilev ise bu küreşniñ mücessemi ola.

«Öz yaşayışını bu küreşke feda etken, neticede yıllar devamında sovet lagerlerinde bulunğan insanğa Vatanına kirişni yasaq etmek – Rusiye akimiyeti tarafından qırımtatarlarğa nisbeten etilgen ciddiy bir toqattır. Şunıñ içün buña Rusiye Federatsiyasınıñ diqqatı hususiy olmalıdır ve doğru netice ve qararlar alınmaq kerektir. Mahkemede çeşit deliller ketirile bile, amma bu meseleniñ yuridik, cinaiy ya da başqa bir negizi yoqtır. Mında yalıñız siyasiy bir mana bardır. Cevabı da siyasiy olmalıdır», – dep qayd ete Meclisniñ reis muavini Nariman Celâl.