Qurultay Teftiş komisyonınıñ nevbetteki toplaşuvı olıp keçti

13 Mayıs 2014

2014 senesi, mayıs 13-te VI Milliy Qurultay Teftiş komisyonınıñ toplaşuvı olıp keçti. Bu toplaşuvda eki mesele muzakere etildi. Birinci mesele Milliy Mecliske Meclisniñ muayyen qararlarınıñ yerine ketirilmesi ve olarnıñ ayatqa keçirilmesine nezaret etilmesi içün mahsus muvaqqat iş gruplarını peyda etmege tevsiye etken muracaat leyihasınen alâqalı edi. Muzakeden soñ, Teftiş komisyonı azalırı çoqusınıñ reyinen bu maracaat leyihasını qabul ettiler.

Kün tertibiniñ ekinci meselesi 2014 senesi, mayıs 9-da qabul etilgen Rusiye Federasyonı Cinaiy kodeksiniñ 280.1 maddesinen alâqalı edi. Bu maddege esasen, “Rusiye Federasyonınıñ territorial bütünligini bozmağa yönelgen areketlerni ayatqa keçirmege açıq davet” içün cezalar tayinlengen.  Bu meseleni muzakere etken soñ, Teftiş komisyonı Milliy Mecliske eñ qısqa vaqıt içinde semetdeşlerimizniñ aqlarını qorçalamaq meselesinde resmiy izaatını azırlap, yardım ola bilecek kütleviy matbuat vastaları yardımınen, yerli meclislerni de buña celp eterek, mümkün olğanı qadar semetdeşlerimiz arasında bunıñ darqalmasını temin etmege tevsiye etken muracaat leyihasını qabıl etti.

Daa tefsilâtlı malümatnı Milliy Meclis resmiy saytında yayınlanğan Qurultay Teftiş komisyonı Milliy Mecliske yapqan muracaatlarnıñ metinlerinden ve Teftiş komisyonı protokolından ögrene bilesiñiz.