Teftiş komisyonı Hıdırlez keçirilmesine qarşı çıqa

23 Aprel 2014

2014 senesi, aprel 23-te VI Milliy Qurultay Teftiş komisyonınıñ toplaşuvı olıp keçti. Toplaşuvda Milliy Meclis qararınen mayıs 3-te “Bağçasaray-Aqmescit” yolunıñ 25-inci kilometrinde yerleşken “Şaherizada” kompleksi yanında umumqırım Hıdırlez bayramını keçirmek meselesi muzakere etildi.

Soñki künlerde olıp keçken vaqialar sebebinden ve, asıl da, tınçlıq olmağan vaziyette, Hıdırlez bayramında halqnıñ, qadın ve balalarnıñ havfsızlığını teminlemek mümkün olmağan alda, Teftiş komisyonı Milliy Mecliske muracaat etip, umumqırım bayramından vazgeçip, onı ananeviy olaraq – azizlerde, şeer ve diger yerleşüv merkezlerinde keçirilmesini teklif etmege qarar aldı.

Daa tafsilâtlı malümatnen Milliy Meclis saytında yerleştirilgen Teftiş komisyonı muracaatından ögrene bilesiñiz.