2014 senesi aprel 15-ke qadar Qurultaynıñ nevbetteki sessiyası ötkerilecek. Qırımtatar halqınıñ Meclisi bir millet arasında referendum keçirüvnen bağlı meselelerni ögrenecek mahsus gruppanı teşkil etti

01 Aprel 2014

R. Çubarovnıñ aytqanına köre 2014 senesi aprel 15-ke qadar ötkerilecek Qurultay sessiyasında mevcut vaziyette Meclisniñ kelecekteki areketlerinen bağlı meseleler muzakere etilecek.

“Sessiyada milliy referendum keçirilmesi ve rey berüvge qoyulacaq meselelerde noqta qoyulır, dep tüşünem”, – dedi Meclis reisi ve ilâve etti ki, eger o vaqıtqace mezkür referendumnıñ halqara teminatı tapılsa.

“Şu anda biz bu işte halqara örneklerni ve yardımcı olabilecek halqara teşkilâtlarnı tapmağa tırışamız. Birinci nevbette bu – davalarnıñ ögüni alabilecek OSCE ya da BMT İnsan aqları boyunca aliy komissar idaresi olacaq”, – dedi Refat Çubarov.

Meclis reisi Refat Çubarov Qurultayda mıtlaqa Mustafa Cemilevniñ de olması içün er şey yapılacağını qayd etti. Meclis erkânınıñ parçalanğanı aqqında emiş-demişlerni reis red etti.

“Meclis daima qararlarnı muzakere ve tartışma neticesinde iç bir türlü basqısız qabul ete, bunıñnen Meclis bölündi demek olmaz”. Aynı zamanda Meclis reisi şunı da bildirdi ki, Meclisniñ bir azası Qurultaynıñ sessiyasına qadar Meclis azalığını toqtatıp turmağa qarar berdi.

“Böyle adım Meclis ve Qurultaynıñ faaliyetini belgilegen vesiqalarda közde tutulmağanına baqmadan qarar alındı, – dep qayd etti reis. – Bu kibi areketlerge munasebetni Qurultay belgileycek”.