Mustafa Cemilev: «Qırımtatarlar Qırımnıñ kelecegini oozleri keçirecek referendumda belgileycekler»

27 Mart 2014

Mart 29 künü Bağçasarayda ötkerilecek Qurultaynıñ nevbetten tış sessiyası Qırımnıñ kelecegi içün müim qarar alacaq. “Biz özümizniñ vekâletli referendumımıznı keçirecemiz”, – dedi Mustafa Cemilev Brüsselde mart 27 künü.

Mustafa Cemilev Brüsselde iş ziyaretiniñ çerçivesinde Avropa Şurasında parlament vekilleri ögünde maruzanen çıqışta bulundı. Amerikağa ziyareti ögünden Brüsselge kelgen Mustafa Cemilev “Demokratik deñişmeler ve Ukraina örnegi” forumında iştirak etip, mart 16 künü Qırımda olıp keçken referendum boyunca fikirini bildirdi.

Bunıñ kibi de o, Qurultay Qırımnıñ kelecegini belgilevde müim bir adım atacağını qayd etti. “Bizim referendum Rusiyeniñkisi kibi sahte olmaz. BMT Telükesizlik Şurasında yapacaq çıqışımda men bu meselede toqtalmaq niyetindem. Qırımtatarlar Qırımnıñ kelecegi boyunca öz referendumını keçirecek”, dedi.

M. Cemilevniñ sözlerine köre qırımtatarlar maceracı ya da hayalperest degiller, öz referendumınen olar imperialist ve işğalciler seçken yolnıñ nasıl olğanını bütün dünyağa kösterirler, – qayd etti Cemilev. Rusiye qırımtatarlarnıñ aqlarını teminlemek meramında olmağanı artıq bütün dünyağa belli olur. Bu areketler işğalniñ aqibetini kösterir”.

Mustafa Cemilevniñ bildirgenine köre qırımtatar qadın ve balalarnıñ bir qısmı terror ve basqı qorqusından Qırımnı terk etmege mecbur oldılar. Bunıñ kibi de o, Qırım işğaline dünya yeterli derecede seslenmedi, dedi.

Forumda reislik yapqan Litvaniya vekili Emmanuel Zigeris özüniñ yeküniy sözünde “Tıştan Avropada er şey sakin körüne. Lâkin Avropa içerisinde telükeni añlamaq ve uyanmaq zamanı keldi. Biz yañı geosiyasiyasiy kerçekler qarşısındamız”, dedi.

Mustafa Cemilevge Brüsselde Milliy Meclisniñ iqtisadiy meseleler boyunca mesleatçısı Rustem Ümerov ve Meclisniñ Almaniyadaki temsilcisi Ahmet Ozay refaqatlıq yaptılar.