Mustafa Cemilev Avropa Birligi ve Avropa qomşucılıq siyasetini kenişletüv meseleleri boyunca Avropa komissarı Ştefan Füle ile körüşti

25 Mart 2014

2014 senesi mart 25 künü Kiyevde qırımtatar halqınıñ lideri, Ukraina halq deputatı Mustafa Cemilev Avropa Birligi ve Avropa qomşucılıq siyasetini kenişletüv meseleleri boyunca Avropa komissarı Ştefan Füle ile körüşti. Körüşüvde Meclis reisi Aslan Ömer Qırımlı da iştirak etti.

Körüşüvde taraflar Qırımda ve Ukrainada kerginlikni yımşatuv, iñqirazdan çıquv yolları, Ukrainada ve işğal etilgen Qırımda stabillikni ğayrıdan tiklev meseleleri muzakere olundı. Bunıñ kibi de Qırımnıñ tamır halqı qırımtatarlarnıñ aqlarını Ukrainada ve halqara seviyede ğayrıdan tiklev meseleleri, Qırımda insan aqlarınıñ bozuluvı, öldürüv, hırsızlav kibi allarğa yol bermemek çareleri baqıldı.

Taraflar VI çağırılış Qurultaynıñ nevbetten tış ekinci sessiyasınıñ kün tertibi ve özüni belgliyev meselesi boyunca referendum keçirilmesini de ayrıca muzakere ettiler.

Qırımtatar halqınıñ meselelerine bağışlanğan Halqara forumnı keçirmek meselesi ve qırımtatar halqı sürgünliginiñ 70 yıllığı munasebetinen matem tedbirlerini azırlav ve keçirüv meselelerine de diqqat ayırıldı.