2014 senesi mart 23 künü Kiyevde Mustaqillik meydanında «Ukraina birligi içün toplaşuv» keçirildi

23 Mart 2014

Qırımtatar halqı Meclisiniñ reisi Refat Çubarov Toplaşuv iştirakçilerine Qırımdan skayp vastasıle hıtap etti:

Qıymetli dostlar, qardaşlar!

Qırımtatar halqınıñ Meclisi ve yarımadanıñ tamır halqı adından Maydanda ve qocaman Ukrainanıñ çeşit köşelerinde bulunğanlarnıñ episine qırımtatar halqına sayğı ve qoltutuv ifade etken samimiy sözleriñiz içün teşekkür bildirmek isteyim.

Ümüt etem ki, bu künlerde qırımtatar halqına tıpqı böyle şekilde dünya devletleriniñ paytahtlarında ve epsi halqlar adından qayğıruv ve qoltutuv kösterile.

Yürekten inanam ki, öz Vatanından iç bir yerge ketmeycek qırımtatar halqınıñ taqdiri, kelecegi dünyanıñ bugün, yarın ve ebediyen qayğısı olur!

Menim azizlerim, kelecekte ne olacağından qatiy nazar halqlar yaşamaq kerek! Yañı kerçekler şaraitlerine tüşken insanlarnıñ episiniñ yaşamağa, evlâtları ve yaqınlarınıñ kelecegine aqları musaviydir.

Biz Qırımda ille bunı müim, dep sayamız. Bizim baş vazifemiz çeşit millet insanları arasındaki barışıqnı saqlap qalmaqtır.

Allahqa dua etemiz ki, Qırımnı, qırımtatar halqı, qırımlı qomşularımız ukrain ve ruslarnı, diger millet vekillerini qorçalasın!

Allahqa yalvaramız ve bütün dünyağa ümüt etemiz. Allah epimiznı qorçalasın!”

“Kiyev qırımtatarlar cemiyeti” cemaat teşkilâtı da bazar künü Toplaşuvğa qoşulıp, Ukraina devletiniñ bütünligini, Qırımnı ve diger regionlarını saqlap qalmaq, vatandaşlarınıñ tınçlığını teminlev oğrunda areketlerni birleştirmek ğayesine qoltutqanını bildirdi.

Toplaşuv çerçivesinde “Kiyev qırımtatarlar cemiyeti” cemaat teşkilâtı ve “Krim_SOS” cemaat teşebbüsi qırımtatar halqınıñ medeniyetini numayış etken muzıkalı-oyun programmasını azırladılar. Qırımtatar muzıkası ve yır sanatını Qırım ve Ukrainada belli icracılar temsil ettiler.

Meydan sanasında Ukraina halq artisti Femiy Mustafayev, Ukrainada hızmet köstergen artist Lenara Osmanova, estrada yırcıları Emiliya Ablayeva ve Lenmar Abdullayev çıqışta bulundılar. “Arzu” ansambliniñ oyuncıları Elnara Abdullayeva ve Timur Kastemirov milliy oyunlarnı icra ettiler.

Bundan da ğayrı “Ukraina bütünligi içün toplaşuv” iştirakçileri Kiyevniñ qalbi olğan Mustaqillik meydanı sanasında icra etilgen qırımtatarlarnıñ milliy gimnini diñlediler

Bu simvolik akt Ukraina – bütün devlet olğanı, qırımtatarlar ukrainler ve diger milletler ile Ukrainanıñ birdem halqı olğanını tekrar kösterdi.