Qırımtatar halqınıñ Meclisi 250-300 halqara közeticiniñ daimiy sürette Qırımnıñ epsi yerlerinde bulunması, bunıñ kibi de BMT Baş kâtibiniñ insan aqları boyunca vekilleriniñ de daimiy bulunması ve ameliy faaliyet köstermesini istey

21 Mart 2014

Meclis reisi Refat Çubarov de BMT Baş kâtibiniñ insan aqları boyunca yardımcısı İvan Şimanoviç ile mart 21-de Aqmescitte körüşti.

Delegatsiya erkânında BMT insan aqları monitoring gruppasınıñ başı Armen Harutünân ve BMT Aliy Komissarı vekâletliginiñ insan aqları boyunca subayı Vrej Atabekân bar ediler.

Meclis tarafından körüşüvde Meclis tışqı alâqalar bölüginiñ başı Ali Hamzin ve yuridik bölükniñ müdiri Teyfuq Ğafarov iştirak ettiler.

İvan Şimanoviç Refat Çubarovğa Qırımğa ziyaretini ta mart 15-te planlaştırğanı, amma Qırım akimleriniñ qoyğan maniaları sebebinden yarımadağa kirmek imkânından marum olğanını hatırlattı. İ. Şimanoviçnıñ söylegenine köre Ukrainağa ziyareti soñki vaqialarnıñ insan aqlarına tesirini talil etmek içün mustaqil közeticilerniñ bulunması zarurlığını kösterdi.

Meclis reisi Refat Çubarov İ. Şimanoviçniñ ricasına köre yarımadada ükümet ve parlament zapt etilmesi, Rusiye askerleriniñ Qırımğa kirmesinen bağlı vaqialarnı birer-birer tarif etti.

R.Çubarov subetdeşiniñ diqqatını şuña celp etti ki, fevral 27 kününe qadar Qırımda Rusiye qoşunlarınıñ kirsetilmesine sebepçi olabilecek milliy mensüpligi sebebinden iç bir basqı olğanı yoqtır.

Mart 16 künü ötkerilgen referendumnıñ neticeleri ve qanuniy esaslarını muzakere eterken. Meclis reisi rey berüvde qırımtatar saylavcılarınıñ yarı fayızı iştirak etkenini qayd etti. “Referendumnı faqat qırımtatarları boykot ettiler, demek doğru degil, – devam etti R. Çubarov. – Ukrainler ve ruslar da qoşunlar bulunğanı ve serbestlik teminlenmegeni alda ötkerilgen bu referendumğa qoltutmadılar”.

BMT Baş kâtibiniñ insan aqları boyunca yardımcısı İvan Şimanoviç Meclis reisi ile qonuşmasında maneviy ve cismaniy zorbalıq, insaniy ve milliy degerlikni aqaretlev, Qırım sakinlerini aqsımlav faktlarını seslendirmekni rica etti. İ. Şimanoviç mart 3-te ğayıp olıp, qıynap öldürilgen ve cesedi Qarasuvbazar rayonında tapılğan Reşat Ametovnıñ ölümi, jurnalist ve aktivistlerniñ ğayıp olmasına kederlengenini bildirdi.

“Bizim vazifemiz Qırım sakinlerine telükeli olğan er angi allarnı tafsilâtlı ögrenmek, Qırımda silâlı insanlarnı silâzsızlandırmaq ve qoşunlarnı deral Qırımdan çıqarmaqnı BMT Baş kâtibi sesiyesinde talap etmektir, – dedi İ. Şimanoviç.

Öz nevbetinde Refat Çubarov şunı qayd etti ki, Qırımtatar halqınıñ Meclisi 250-300 halqara közeticiniñ daimiy sürette Qırımnıñ epsi yerlerinde bulunması, bunıñ kibi de BMT Baş kâtibiniñ insan aqları boyunca vekilleriniñ de daimiy bulunması ve ameliy faaliyet köstermesini istey.