Meclis reisi Refat Çubarov: Bizim baş vazifemiz birlik-beraberligimizni saqlap qalmaqtır, çünki bu, balalarımız ve torunlarımıznıñ öz vatanında parlaq ve munasip keleceginiñ reinidir

21 Mart 2014

2014 senesi mart 21 künü ulu qırımtatar mütefekkiri, yazıcı, naşır, ilk türk tilli “Terciman” gazetasınıñ tesisçisi, milliy tasil islâatçısı İsmail Gasprinskiy doğğanınıñ 163 yıllığına bağışlanğan tantanalı tedbirler çerçivesinde Aqmescitte onıñ eykeline çeçekler qoyuv tedbiri ötkerildi.

Tantanalı merasimde milliy areket veteranları, Qırımtatar halqı Meclisiniñ azaları, Qurultay delegatları, cemaat teşkilâtlarınıñ vekilleri, QMPU, TMU qırımtatar ve şarq filologiyası fakultetiniñ ocaları ve studentleri, İ. Gasprinskiy adına cumhuriyet qırımtatar kütüphanesiniñ hadimleri ve digerleri iştirak ettiler.

Tedbir milliy gimnni icra etüvden başlandı. Qırım musulmanları müftisiniñ muavini Esadullah Bairov İ. Gasprinskiy ruhuna dua oqudı.

Belli qırımtatar söz ustası Riza Yusuf rahmetli şair Şakir Selimniñ İsamil Gasprinskiyge bağışlap yazğan “Bağışlav” şiirini oqudı.

Büyük siyasetçi ve islâatçı İsmail Gasprinskiyniñ türk dünyasını birleştirüv işine qoşqan salmaqlı issesi aqqında öz çıqışında Qırımda azerbaycan cemiyetiniñ reisi Ragim Gumbatov ayttı.

“Bugün biz ulu ocamız ve mütefekkirimiz İsmail Gasprinskiyniñ hatırasını añmaq içün toplaştıq. Onıñ mirası halqımıznıñ öz vatanında yaşaması ve inkişaf etmesiniñ temeli oldı, – dedi Meclis reisi Refat Çubarov öz çıqışınıñ başında. – Biz toqtalmadıq, ve bugünde peyda olğan zorluqlarğa baqmadan Qırım ve qırımtatar halqı ebediyen beraber olacağında eminmiz”.

İ. Gasprinskiyniñ meşur “Tilde, fikirde, işte birlik” sloganını seslendirgen Refat Çubarov, bugünde-bugün qırımtatar halqı ve Qırım zor künlerni yaşağan bir vaqıtta qırımtatarlar aynı işleri, fikirleriniñ birligi, milliy ruhlarınıñ qaviyligi sayesinde bütün qıyınlıqlarnı yeñebilirler, dedi.

“Bizim baş vazifemiz birlik-beraberligimizni saqlap qalmaqtır, çünki bu, balalarımız ve torunlarımıznıñ öz vatanında parlaq ve munasip keleceginiñ reinidir”, – qayd etti R. Çubarov.

Aqmescitteki tedbir iştirakçileri Qırımnıñ tarihiy paytahtı Bağçasarayğa yol aldılar. Anda da Gasprinskiy eykeline gülçemberler qoyulıp, mütefekkiniñ Zıncırlı medresesi yanında mezarında dua oquldı.