Türkiye Baş naziri Ukrainanıñ bütün ve mustaqil olmasınıñ tarafdarı olaraq, yabancı küçlerniñ Ukraina içki işlerine qarışmasına qarşı çıqa

16 Mart 2014

2014 senesi mart 16 künü Türkiyeniñ İzmir şeerinde Türkiye Cumhuriyetiniñ Baş naziri Recep Tayip Erdoğannıñ qırımtatar halqınıñ lideri, Ukraina halq deputatı Mustafa Cemilev ile körüşüvi yekünlendi. 

Bir saat devam etken körüşüvde taraflar yüz bergen adiseniñ tınç çezimine esaslanaraq Qırım inqirazından çıqmaq yolları hususında tekliflerni muzakere ettiler.

Türkiye ükümetiniñ başı R.T.Erdoğan hatırlattı ki, Qırımda inqiraznı Ukrainanıñ territorital bütünligi saqlanıp qalması esasında tınç usulnen çezüvde Türkiyeniñ pozitsiyası qattı ve deñişmez.

M. Cemilevniñ sözlerine köre Türkiyeniñ baş naziri şunı qayd etti ki, Türkiye Ukrainanıñ bütün ve mustaqil olmasınıñ tarafdarı olaraq, yabancı küçlerniñ Ukraina içki işlerine qarışmasına qarşı çıqa. Bundan da ğayrı Recep Tayip Erdoğan mart 16-da Qırımda keçirilgen referendumnı tanımaycağını bildirdi, çünki o halqara normalarğa uymay.

Türkiye ükümetiniñ başı inqiraz devam etkeninden qasevetlenlerini bildirip, qırımtatar halqına nasıldır bir basqı yapılğan kibi olsa er taraflama yardım bermege azırlığını tasdiqladı. 
 

Körüşüv devamında qırımtatar ve türkiyeli iş adamları arasında iqtisadiy işbirlik meseleleri de baqıldı.