Meclis reisi Refat Çubarov: Qırım Yuqarı Şurası deral dağıtılmalı!

23 Fevral 2014

“Ukraina Yuqarı Şurası fevral 22 künü qabul etken qararlar mantıqlı olaraq, öldürüvler başlanğandan itibaren yoq olğan devletniñ idaresini pekiteler, – dedi TSN (televizoin haberler hızmeti)ne izaat bergen Qırımtatar halqı Meclisiniñ reisi Refat Çubarov. – Murekkep tarafı şunda ki, Harkovdeki toplaşuvdan soñ bazı regionlar bugün Ukraina Yuqarı Şurası alğan qanun ve qararlarnı eda etecek ya da eda etmeyceklerini bilmeyip, beklemekteler.

Refat Çubarov emin ki, yerlerde, şu cümleden Qırımda da, er angi göñülsiz neticelerden qaçınmaqnıñ birden bir yolu Ukraina Yuqarı Şurası qabul etken qararlarnı bir minsiz eda etmektir. Meclis reisi Qırım Yuqarı Şurası deral dağıtılması kerek, dep qayd etti.

“Qırım Yuqarı şurası ya da daa doğrusı, onıñ yolbaşçıları, aqiqiy vekâletli organ olamadılar, olar sadece Regionlar partiyasınıñ Qırımdaki vekiliniñ vazifesini eda ettiler, – dep saya R.Çubarov.

Onıñ fikrince Qırım Yuqarı Şurasınıñ yañı erkânı qırımtatar halqınıñ kefaletli temsilciligi temin etilgen yañı saylav qanunına köre saylanmalı.

“Qırımtatarlar – bu topraqnıñ tamır halqıdır, Qırımdan başqa yerde onıñ tarihiy vatanı yoqtır, – dedi R. Çubarov. – Biz öz problemlerimizni faqat Qırım ve Ukrainada çezebilemiz, şunıñ içün de yañı qanun Qırımda yaşağanlarnıñ episine, şu cümleden qırımtatarlarnıñ da, aqları ve menfaatlarına musaviy yanaşuv imkânını bermesi kerek”.