Mustafa Cemilev ayırımcılarnı cinaiy cevapkârlıqqa çekmekni talap etti

22 Fevral 2014

“Meslekdeşim Tomenko (Ukraina halq deputatı, “Batkivşçina” birleşmesi) şimdi dedi ki, Qırım yolbaşçıları “aqıllandılar” ve ayırımcılıq beyanat ve areketlerinden vazgeçtiler, – dep başladı Mustafa Cemilev fevral 22 künü parlamentte öz çıqışını. – Mencesine, bu böyle degil. Bugün Qırımda alâ daa ayırımcılıq telükesi mevcut. Yani Qırımnı Ukrainadan ayırıp, Rusiye federatsiyasına qoşmaq maqsadları bar”.

M.Cemilev ayırımcılıq areketlerine Qırım Yuqarı Şurası reberlik yapqanını hatırlattı.

“Eki kün evelsi Moskvada bulunğan Qırım Yuqarı Şurasınıñ reisi Vladimir Konstantinov qaytıp kelgen soñ Qırım Yuqarı Şurasınıñ nevbetten tış sessiyasını keçirmekni planlaştırğan. Ve onda Regionlar partiyası deputatlarınıñ çoqluğı ile Qırımnı Rusiyege qoşmaq aqqında qarar almaq niyetinde edi. Bunıñ kibi de Kremlge Qırım vatandaşlarını qorumaq çağıruvınen muracaat etmekge istediler, – dedi M. Cemilev. – Faqat, Ukraina bütünliginiñ tarafdarı olğan ve Milliy Meclisniñ operativ areketleri ve qırımlı siyasetçilerniñ akıl-feraseti sayesinde bu plannıñ kerçekleşmesine yol berilmedi”.