Zeynur Yakubov: «Biz qan tökülmesine yol bermeden, devletniñ bütünligini saqlap qalmaq ve özara sayığıda bulunmaq kerekmiz»

21 Fevral 2014

Qırım Halq cumhuriyetiniñ birinci reisi, Qırım, Litvaniya, Poloniya, Beyaz Rusiye musulmanlarınıñ müftisi Noman Çelebicihan öldürilgeniniñ 96 yıllığına teşkil etilgen hatıra tedbirler çerçivesinde 2014 senesi fevral 21 künü Qırımnıñ bütün camilerinde olğanı kibi Kezlevdeki de Cuma camisinde dua oqulıp, matem mitingi keçirildi.

Kezlev regional meclis tarafından teşkilâtlandırılğan matem mitingi Noman Çelebicihan yaşağan evniñ yanında olıp keçti. Büyük devlet erbabınıñ hatırasını añmaq içün Milliy Meclis ve Kezlev regional meclis azaları, Kezlev şeer şurası ve Kezlev sakinleri keldiler.

Toplaşqanlarnıñ qarşısında çıqışta bulunğan Meclis azası Zeynur Yaqubov qayd etti ki, 96 yıl evelsi Noman Çelebicihan öz halqınıñ aqları ve demokratik printsipler içün küreşte vahşiyane öldürilgen edi.

“Bugün, Ukraina içün facialı künlerde, devlette adalet ve demokratiya içün küreş yüzden ziyade insannıñ canını alğanda mustaqil Ukrainada yaşağan halqlar iç bir vatandaşnıñ qanı tökülmesine yol bermemek, memleketniñ territorial bütünligini saqlap qalmaq, özara sayğı aqqında unutmamaq kerekler, – dedi Zeynur Yaqubov.

Mitingden soñ Kezlevniñ baş Cuma camisinde cuma namazı qılınğan soñ Noman Çelebicihan ruhuna dua oquldı.