Aluşta regional meclisi ve Aluşta şeer akimiyeti qırımlı siyasetçilerni ayırımcılıq beyanatlarından vazgeçmege çağıralar

21 Fevral 2014

Fevral 21 künü Aluşta şeer meriyasında Aluşta şeer yolbaşçısı Stanislav Kolot ve Aluşta regional meclisiniñ reisi Enver Arpatlı beraber toplaşuv keçirdiler. Onda Aluşta regional meclisiniñ azaları, Aluşta regionındaki yerli şuralarnıñ reisleri, Ukraina İçki işler nazirliginiñ Aluşta bölügi ve Ukraina Devlet telükesizligi komitetiniñ Aluşta bölügi, Aluşta prokuraturası ve diniy birleşmelerniñ vekilleri iştirak ettiler.

Aluşta regional meclisiniñ reisi Enver Arpatlı bildirgenine köre, toplaşuvda esas mesele olaraq memleketteki siyasiy- içtimaiy vaziyet esnasında Qırımda meydanğa kelgen vaziyet muzakere etildi. “Toplaşuvda bulunğanlar regionda fesat çıqmasına qarşı bütün küç ve imkânlarnı birleştirmek, Aluşta regionında iç bir türlü toqnaşuv ve davalarnıñ olmasına yol bermemek hususında umumiy fikir bildirdiler”, – dep haber etti Aluşta regional meclisiniñ reisi Enver Arpatlı

Bundan da ğayrı, taraflar qırımlı siyasetçilerni ayırımcılıq fikirlerinden vazgeçmege çağırıp, Qırım spikeri V. Konstantinovnıñ memlekette vaziyet kerginleşkeni taqdirde Qırım Ukrainadan ayırılabilecegini tahmin etkenini keskin qaraladılar.