Qırım Yuqarı Şurasınıñ «Qurultay-Ruh» fraktsiyasınıñ azası Remzi İlyasov Qırım parlamentini siyasiy inqiraznıñ tınç çezilmesi içün bütün küçlerni sarf etmege çağırdı

19 Fevral 2014

“Ukrainada facia yüz berdi ve biz qan tökülmesi, küç işletilmesine yol berilmemek kerekligini añlamalımız, – dedi Qırım Yuqarı Şurasınıñ “Qurultay-Ruh” fraktsiyasınıñ azası Remzi İlyasov fevral 19 künü Ukrainadaki siyasiy-içtimaiy vaziyet ve fevral 18 künü Kiyevdeki çatışmalarnıñ şiddetleşmesi muzakere etilgende. – Men şunı da söylemege isteyim ki, eki taraf da davanı tınç yolnen çezmek yollarını qıdırmaq kerekler”.

R.İlyasov bunıñ kibi de qırımlı millet vekilleriniñ diqqatını fevral 18 künü Meclis qabul etken beyanatqa celp etip, Qırım sakinlerini iç bir türlü fesatqa qapılmamağa, özara sayğı ve ürmet köstermege çağırdı.

R. İlyasovnıñ fikrince Ukrainanıñ er bir vatandaşı memleketteki inqiraznıñ tınç yolnen çezilmesine isse qoşmaq kerek. Muhtariyet parlamentiniñ deputatlarına Qırım sakinleriniñ problemlerini tüşünmege ve öz çıqışlarında devlet vatandaşlarına nisbeten “azlıq” sözüni qullanmamağa çağırdı.

Çünki bu devlet vatandaşlarınıñ aqlarını aqsımlay. Qırım statusı hususında bazı deputatlarnıñ sözlerini izatlayaraq Yuqarı Şura deputatlarına Qırımnıñ angidir bir devletke qoşulmasına irişmeden ve böyle şamatalı çıqışlarnı yapmadan evel aqıl-ferasetini işletmege çağırdı. Bunıñ kibi de Remzi İlyasov Ukraina Milliy telükesizlik hızmetiniñ Qırımdaki baş idaresiniñ reberi Gennadiy Kalaçövnıñ keskin çıqışlardan vazgeçmek çağıruvına qoltutqanını bildirdi.

“Deputat ve vazifedar insanlarnıñ ağızından çıqqan bu sözler añlaşmamazlıq, can ağırtuv ve çatışmalarğa alıp kele”, – dep qayd etti R.İlyasov.