Refat Çubarov: «Er bir muhtariyetniñ, angi devlet erkânında olmasın, inkişafı ilk-evelâ onıñ sakinleriniñ barışığına bağlıdır

19 Fevral 2014

Refat Çubarovnıñ fikrince Er angi muhtariyetniñ, angi devlet erkânında olmasın, inkişafı ilk-evelâ onıñ sakinleriniñ barışığına bağlıdır. Bu aqta “Kurultay-Ruh” fraktsiyasınıñ başı Qırım Yuqarı Şurasınıñ fevral 19-da yapqan çıqışında “Qırım anayasa-uquqiy statusını mükemmelleştirüv ve muhtariyet vekâletliklerini arttıruv aqqında”ki qarar leyhasını izaatlayaraq ayttı.

“Eger muhtariyet içinde barışıq üküm sürse, devlet merkezinen vekâletlerni belgilevnen bağı meseleler bayağı qolay ve insanlar içün faydalı şekilde çezilebilir, – dedi eminliknen fraktsiya yolbaşçısı. – Em bu sadece zayıflıq degil, 22 yıldan berli közetilip kelgen yañlış inkişaftır. Bu salonda oturğanlarnıñ bir çoqları er bir meseleni qol köterüvnen çezmek mümkün, çoqmilletli ve çoq dinli cemiyette çoqluq azlıqnı “bastırır” dep oylay ediler.

R.Çubarov muhtariyet qurulması birinci nevbette menfaatlar, mesüliet ve aqlar musaviyligini közde tuta, dep añlattı.

“Eger biz muhtariyetimizniñ qaviy inkişaf etmesini istesek, Qırımda yaşağan epsi halqlarnıñ teñ inkişafını teminlegen mehanizmlerni de köz ögüne almaq kerekmiz. Başqa yolu yoqtır, – dedi R. Çubarov.

Bundan da ğayrı, “Kurultay-Ruh” fraktsiyasınıñ başı şunı da hatırlattı ki, qırımtatarlarnıñ Qırım ve Ukraina tışında başqa vatanı yoqtır. “Mında oturğanlarnıñ bazıları kibi bizim halqımıznıñ muracaat etecek iç kimsesi yoqtır. Biz tek mında, Qırımdaki qomşularımızğa, bütün Qırım cemiyetine ve ukrain devletine muracaat etebilemiz”, – dedi R.Çubarov.