Meclis reisi Refat Çubarov Türkiye Cumhuriyeti Şimaliy Qıbrızdaki Ortaşarq universitetiniñ tesisçisi ve rektorı Suat Günselni qabul etti

11 Fevral 2014

2014 senesi fevral 11 künü Qırımtatar halqı Meclisiniñ reisi Refat Çubarov ve Ukraina halq deputatı Mustafa Cemilev Türkiye Cumhuriyeti Şimaliy Qıbrızdaki Ortaşarq universitetiniñ(Yakın Doğu Üniversitesi) tesisçisi ve rektorı Suat Günsel, rektor yardımcısı Fahrettin Sadıqoğlu ve Meclisniñ Qıbrızdaki temsilcisi Selâmi Qaçamaqnı Meclisniñ ofisinde qabul ettiler.

Körüşüv rektornıñ Qırımda iş ziyareti çerçivesinde olıp keçti.

Qonuşma devamında Mustafa Cemilev ve Refat Çubarov Suat Günselge qırımtatar gençlerine Türkiye Cumhuriyeti Şimaliy Qıbrızdaki eñ nufuzlı universitetlerden birisinde oqumaq imkânını bergeni içün teşekkür bildirdiler.

Suat Günsel Qırımnı munasip temsil etken 13 studentniñ oquvından memnün olğanını söyledi. “Qardaş qırımtatar halqı ve Milliy Meclis ile munasebetlerimiz ve işbirligimizden ğururlanamız ve yüksek qıymet kesemiz, – dedi rektor Suat Günsel. – Bugün universitetimizde dünyanıñ 96 ülkesinden 20 biñden ziyade student oqumaqta. İstidat, vatanperverlik ve yüksek bilgi seviyesini köstergen qırımtatar studentleri bizim universitetimizde oquğanını kendimiz içün şeref dep bilemiz”.

Öz nevbetinde Meclis reisi Refat Çubarov Türkiye Cumhuriyeti Şimaliy Qıbrızdaki Ortaşarq universitetinen çoqyıllıq ve mahsuldar işbirlik hatirine universitet rektorı Suat Günselge qırımtatar gençlerini inkişaf etkeni ve qırımtatar halqına köstergen yardımı içün hatıra nişanını ediye etti.

Subet vaqtında taraflar şunı da qayd ettiler ki, tasil ve ilim saasında munasebetlerni pekitmek maqsadında faal ve mahsuldar iş devam ettirilecek.

Körüşüvde QMPU rektorı Fevzi Yaqubov, Meclis reisiniñ muavini Aslan Ömer Qırımlı ve Nariman Celâl, bunıñ kibi de Meclis reisiniñ Türkiye meseleleri boyunca yardımcısı İsmet Yüksel iştirak ettiler.

Malümat içün: 2009 senesi avgust 15 künü Qırımtatar halqı Meclisiniñ reisi Mustafa Cemilev ve Türkiye Cumhuriyeti Şimaliy Qıbrızdaki Ortaşarq universitetiniñ rektorı, professor Suat Günsel Türkiye Cumhuriyeti Şimaliy Qıbrız ve Ukraina arasındaki dostane munasebetler çerçivesinde uzun müddetli eki taraflı işbirlik, bunıñ kibi de iqtisadiy, tehnikiy, ilmiy ve medeniy saalarda eki taraflı tehnikiy, ilmiy ve tasil munasebetler aqqında añlaşma imzaladılar.

Er yıl Qırımdan Ortaşarq universitetine iqtisadiy ve sotsial ilimler fakultetinde tasil almaq içün 3 insan yollanıla.