AQŞ elçiliginiñ vekilleri Qırımtatar halqınıñ Meclisinen işbirlikni pekitmek niyetindeler

10 Fevral 2014

2014 senesi fevral 10 künü Qırımtatar halqı Meclisiniñ reisi Refat Çubarov AQŞnıñ Ukrainadaki Elçiligi İqtisadiy bölüginiñ hadimleri – birinci kâtibi Kristofer Smit ve üçünci kâtib Endrü Barii ile körüşti.

Meclis ofisinde keçirilgen bu körüşüvde Meclis reisiniñ muavinleri Aslan Ömer Qırımlı ve Nariman Celâl, Meclisniñ tış alâqalar bölüginiñ başı Ali Hamzin iştirak etti.

Meclis reisine hıtap etken AQŞnıñ Ukrainadaki Elçiligi İqtisadiy bölüginiñ birinci kâtibi Kristofer Smit Elçilikniñ Meclis ile munasebetleriniñ uzun ve müsbet bir tarihı olğanını qayd etti.

Körüşüvniñ bayağı qısmını onıñ iştirakçileri Qırımdaki vaziyetni ve Ukrainada devam etken siyasiy inqıraz esnasında qırımtatar halqınıñ alını talil etüvge bağışladılar.

Meclis reisi Refat Çubarovnıñ sözlerine köre, 2014 senesi yanvar 16-da demokratiyağa zıt qanunlar qabul etilgenine ve soñra lâğuv olunğanına baqmadan memlekette insan aqlarını aqsımlav, cemiyet institutlarınıñ sıñırlav areketleri ep quvetleşmekte. Bu ise kesinliknen Ukrainanı tışqı dünyadan ayıracaq.

Aynı zamanda Refat Çubarov qayd etti ki, halqara teşkilâtlarnıñ, bunıñ kibi de Avropa Birliginiñ azası olğan devletlerniñ Ukrainağa yardım etmek oğrundaki aktivligi siyasiy iñqırazdan tınç şekilde çıqmaq imkânını berir. Belli ki, siyasiy iñqıraz Ukraina yolbaşçılarınıñ Avropa Birligi ile birleşmek aqqındaki añlaşmanıñ imzalanmasını toqtatıp turmaq boyunca qararından soñ yüz bergen edi.

Avropa Birligi ve demokratik devletlerniñ Ukrainağa siyasiy iñqırazdan çıqmasına yardım sırasında mıtlaqa Ukrainanıñ resmiy akimiyeti tarafından diqqatqa alınmağan mevzu yani 2014 senesi Qırımtatar halqınıñ meselesi boyunca halqara forum keçirüv mevzusı da olmalıdır.

“Fursattan faydalanaraq, men Halqara forum keçirmek zarurlığına birinciler sırasında qoltutqan AQŞ akimiyetine teşekkür bildirmek isterdim, – dedi Refat Çubarov. – Biz Avrorpa Birligi azaları olğan devletler, bunıñ kibi de Kanada ve Türkiyeniñ Halqara forum keçirilmesine qoltutqanlarına yüksek qıymet kesemiz. Biz ileride de Halqara forumnı azırlav ketişatını közetüvni boynuna alğan OSCE milliy azlıqlarnıñ işleri boyunca aliy komissarnen birlikte forumnı mayıs 18-ge qadar keçirmek içün zarur tedbirlerni körecekmiz”.

Öz nevbetinde, AQŞnıñ Ukrainadaki Elçiligi İqtisadiy bölüginiñ birinci kâtibi Kristofer Smit qayd etti ki, Amerika Elçiligi Ukrainada Halqara forum keçirmekniñ tarafdarıdır. Forumda qırımtatarlarnı yerleştirüv işinde Ukrainağa yardım bermek meseleleri de muzakere etilecek.

Körüşüv devamında Meclis reisiniñ muavini ve aynı zamanda tışqı iqtisadiy alâqalar, yatırımlar ve milliy iqtisadiyatnı inkişaf ettirüv idaresiniñ başı Aslan Ömer Qırımlı Meclis devletteki inqıraznı barışıq usullarınen çezmek tarafdarı olğanını qayd etti.

Bundan da ğayrı, iqtisadiy ve yatırım işbirligi istiqballerini muzakere eterek Aslan Qırımlı Amerikadaki biznes teşkilâtlarnen iqtisadiy bağlar qurmaq, Ukraina regionlarında yatırım leyhalarını amelge keçirüvge qoltutuvda menfaatdarlığını seslendirdi.

Tışqı alâqalar idaresiniñ başı Ali Hamzin Qırım akimiyeti tarafından yatırım leyhaları boyunca alğan qararları Qırım cemiyetinde telâş doğurğanını qayd eterek, bu leyhalarnıñ kerçekleştirilmesi milletlerara davalarnı qozğayabilecegini tahmin etti. Çünki bu iş Qırım topraqları ve diger sıñırlı resurslarnıñ alınmasını közde tuta. Böyle leyhalardan biri, Ali Hamzinniñ fikrince, Qırım akimiyeti keniş reklama etken Qırımğa Qıtay yatırımlarını celp etüv planlarıdır.

Bu munasebetnen Meclis reisi Refat Çubarov zenaatdaşları yatırımlarnıñ şeffaflığı ve yatırımcılarnıñ mesülietligi boyunca seslendirgen tezislerini maqulleyerek, qırımtatar halqı tek qırımtatarlarnıñ yerleşmesi problemleriniñ çezimine, cemiyetniñ inkişafına siltem bergen ve doğrultılğan yatırım leyhalarına qoltutacaqlarını qayd etti.

Körüşüvniñ soñunda taraflar Qırım inkişafı ve onıñ sakinleriniñ meselelerinen bağlı suallerni muzakere etmek içün körüşüv ve konsultatsiyalarnı devam ettirmege azır olğanlarını bildirdiler.