Meclis yolbaşçılarınıñ regional meclis reislerinen körüşüvi

10 Fevral 2014

2014 senesi fevral 10 künü Aqmescitte Qırımtatar halqı Meclisiniñ regional meclis reislerinen birlikte toplaşuvı olıp keçti.

Onda Meclis reisi Refat Çubarov ve onıñ muavinleri Zaur Smirnov, Ahtem Çiygoz, Nariman Celâl iştirak ettiler.

Kün tertibine dört mesele kirsetildi:

1. Noman Çelebicihan vefatınıñ yıldönümi munasebetinen miting keçirüv aqqında;

2. Saq regional meclisiniñ “Qırımda ve Saq regionında meydanğa kelgen vaziyet aqqında” alğan qararınıñ muzakeresi;

3. Meclisniñ regional meclislernen işbirligi;

4. Umumiy meseleler.

Milliy Meclis reisi Refat Çubarov qayd etti ki, regional meclisler Qurultay delegatları, yaşlar teşkilâtları ve diniy cemiyetlerniñ işini teşkilâtlandırması kerek. Meclis reisiniñ çıqışından soñ regional meclislerniñ reisleri fevral 23 künü Noman Çelebicihan vefatınıñ 96 yıllığı munasebetinen Aqmescit ve Aqyarda keçirilecek mitinglerni teşkilâtlandıruvda yardım bermege azırlıqlarını bildirdiler.

Kün tertibiniñ ekinci meselesi Saq regional meclisiniñ Qırımda ayırımcılıq areketlerini qaralap, Ukraina Telükesizlik hızmeti, Baş prokuraturası, İçki işler nazirliginden Qırımda ayırımcılıq areketlerini yapqan şahıslarnıñ cevapkârlıqqa çekilmesini talap etken muracaatı muzakere olundı.

Saq regional meclisniñ teşebbüsine qoltutqan regional meclislerniñ reisleri yerlerde de aynı böyle muracaatlar qabul etmek qararını alıp, böyle bekçiler qurumlarını tizmek Ukraina qanunlarına zıt kelgeni ve kerginlikni qozğağanını qayd ettiler.

Öz nevbetinde Meclis reisi qayd etti ki, böyle qararlarnıñ öz vaqtında alınması Ukrainadaki kergin vaziyet şaraitinde Qırım kibi mürekkep bir yerde barışıqnıñ saqlanıp qalmasını teminler.

Zaur Smirnov, regional meclislerniñ esabatları ve planları aqqında ikâye eterken şunı qayd etti ki, bazı meclislernen alâ daa bağ qurulmadı. “Em bu resmiyetçilik degil, çünki biz bu meseleni diqqat ile közetemiz”.

“Şunı da qayd etmek isteyim ki, bu formalar bizden ziyade regional meclislerge kerek, çünki olar semereli çalışmaq imkânını yaratırlar”, – dedi Meclis reisiniñ muavini.