Saq regional meclisi Qırımnıñ bütün yerli milliy idare organlarını öz hududlarında asılında Qırım sakinlerini qanunsız seferber etüv şekili olğan «Qırım göñülli qoruyıcılar» nı teşkil etmelerini toqtatmağa çağırdılar

10 Fevral 2014

2014 senesi fevral 9 künü Meclis reisiniñ muavini Zaur Smirnov Saq regional meclisi ve musulman cemiyetleriniñ toplaşuvında iştirak etti.

Memleketteki siyasiy-içtimaiy vaziyet esnasında Qırımda ve Saq rayonında meydanğa kelgen vaziyet muzakere etilgen toplaşuvnıñ işinde Qurultay Teftiş komissiyasınıñ reisi Ali Özenbaş, Meclis azası Şevket Qaybullayev, Saq içki işler bölügi ve Saq telükesizlik hızmetiniñ, bunıñ kibi de Saq rayon devlet memuriyetiniñ vekilleri de iştirak ettiler.

Saq regional meclisiniñ reisi Eskender Bilâlov haber etkenine köre toplaşuv iştirakçileri regiondaki vaziyetni etraflıca muzakere eterek, bir sıra qırımlı siyasetçilerniñ vatandaşlarnı seferber etmege çağıruvları munasebetinen Qırımda ayırımcılıq areketlerini keskin qaralamaq qararını aldılar.

Ukraina Telükesizlik hızmeti, Ukraina Baş prokuraturası, Ukraina İçki işler nazirliginden ise Qırımda ayırımcılıq areketlerinde qabaatlı şahıslarnı cevapkârlıqqa çekmekni talap ettiler.

“Biz Qırımnıñ bütün yerli milliy idare organlarını öz hududlarında asılında Qırım sakinlerini qanunsız seferber etüv şekili olğan ve Qırım cemiyeti içinde işançsızlıq ve kerginlikni qozğağan “Qırım göñülli qoruyıcılar” nı teşkil etmelerini toqtatmağa çağırıp muracaat etmek qararına keldik”, – dep qayd etti E. Bilâlov.

Öz nevbetinde Meclis reisiniñ muavini Z. Smirnov şunı da qayd etti ki, toplaşuv iştirakçileri Qırım Telükesizlik hızmeti, Qırım Baş prokuraturası, Ukraina İçki işler nazirliginiñ Qırımdaki baş idaresine muracaat etip, Qırım ve Aqyar şeeriniñ yerli idare organları göñülli bekçiler qurumlarını tizmek kibi areketlerine qıymet kesmekni ve cemaat teşkilâtları ve siyasiy partiyalar özleriniñ mudafaa qurumlarını tizmelerini yasaq etmelerini talap ettiler.

Zaur Smirnovnıñ sözlerine köre Meclis reberleriniñ fevral 10 künü regional meclis reislerinen keçirecek toplaşuvında Qırımnıñ diger rayonlarında da bunıñ kibi qararlar alınması tevsiye etilecek.