Aqmescitte «Yevromaydan-Krım» Bütünqırım forumı ötkerildi

08 Fevral 2014

2014 senesi fevral 8 künü Aqmescitte ötkerilgen “Yevromaydan-Krım” Bütünqırım içtimaiy-siyasiy teşebbüsler forumında Qırımnıñ çeşit köşelerinden kelgen Yevromaydan faalleri, bunıñ kibi de Mecli Kâtibiyetiniñ başı Dilâver Akiyev, Meclis azaları Abduraman Egiz ve Eskender Bariyev, Qırım Yuqarı Şurası “Kurultay-Ruh” fraktsiyasınıñ deputatı Leonid Pilunskiy iştirak ettiler.

Dilâver Akiyevniñ sözlerine köre başta forumnı Subaylar evinde keçirmek planlaştırılıp, sabadan anda insanlar toplaştı, lâkin binanıñ kiralanması añlaşılğanına baqmadan qapısı qapalı ve üstünde “Raatlıq künü” dep yazılğan tahta asılı edi.

“Forum iştirakçilerini bina içine kirsetmediler ve olar Ukraina Prezidentiniñ Qırımdaki daimiy vekâletliginiñ ofisi yanına barıp, tedbirni anda keçirdiler, – dedi Akiyev. – Forum başlanğan soñ o yerge “Russkoye yedinstvo”, “Russkiy blok”, “Stop-Maydan” faalleri, kommunistler keldiler. Yevromaydan faalleriniñ çıqışlarını bastırmaq içün olar arabalarınıñ içinden muzıka qoyıp, aynı zamanda “Bandera keçmez”, “Faşizm keçmez” dep qıçırdılar. Amma Forum iştirakçileri bu fesatqa seslenmediler.

Milliy Meclis adından forumda Abduraman Egiz çıqışta bulunıp: “Yevromaydan devlette doğru ve açıq qaidelerine qoltutqan insanlarnı temsil ete, demek narazılıq da avropacasına yani zorbalıqsız olmadıdır, – dedi Meclis azası Abduraman Egiz. – Yevromaydan – bu ukrain halqınıñ avropacasına kelecekke aqqınıñ numayışıdır. Biz añlamalımız ki, deñişme yalıñız devlet akimiyeti qurumında degil de, başta insanlarnıñ añında yüz bermeli”.

Abduraman Egiz şunı da qayd etti ki “Kiyevde Yevromaydanda turğan fedaiy insanlarnıñ sayesinde deñişmeler elde etildi. Amma biz bu deñişmeler tınç yolnen yapılmasınıñ tarafdarlarımız. Biz, Qırımtatar halqınıñ Meclisi, zorbalıq usullarına qarşımız, memuriy binalarnıñ işğal etilmesine qarşımız. Devlet çalışmaq, devlet organları öz vazifelerini eda etmek kerekler. Biz davalar avropacasına çezilmesini isteymiz. Öz aqlarımız içün avropacasına, küç işletmeden küreşçmege isteymiz”.

Tedbirniñ soñunda birağızdan qarar qabul etildi.

Resim:  15minut.org