Meclis reisi Refat Çubarov Almaniya Tış işleri nazirliginiñ Şarqiy Avropa devletlerinen alâqalar bölüginiñ müdiri Manfred Huterer ile körüşti

06 Fevral 2014

2014 senesi fevral 5 künü Almaniya Tış işleri nazirliginde Milliy Meclis reisi Refat Çubarov ve onıñ muavini Aslan Ömer Qırımlı Tış işleri nazirliginiñ Rusiye, Ukraina, Beyazrusiye, Moldova devletlerinen alâqalar ve Şarqiy ortaqlıq boyunca bölüginiñ müdiri Manfred Huterer ile körüşti.

Körüşüv iştirakçileri qırımtatar halqınıñ aqlarını ğayrıdan tiklev boyunca problemlerni çezmek istiqballerine ayrıca diqqat ettiler. Bu munasebetnen Refat Çubarov subetdeşiniñ diqqatını 2014 yılda Qırımtatar halqınıñ aqlarını tiklev, Ukrainada onıñ saqlanıp qalması ve inkişafını teminlev boyunca halqara forumnıñ keçirilmesine celp etti.

Aslan Ömer Qırımlı, Manfred Hutererniñ teklifine seslenerek, oña Qırımnıñ iqtisadiy inkişafınıñ bugünki hususiyetleri aqqında malümat berdi ve qırımlı ve alman iş adamlarınıñ ortaqlığını kenişletmek hususında bir sıra tekliflerini bildirdi.

Körüşüv devamında Ukrainada siyasiy iñqıraz esnasında qırımtatar halqınıñ vaziyeti muzakere etildi. Bu esnada Qırımda siyasiy-içtimaiy vaziyetni talil etken Refat Çubarov yarımadada ayırımcı küçlerniñ aktivleşkenini qayd etti.

“Ukraina ve Qırım içün bugünki mürekkep bir vaqıtta bizim pozitsiyamız Ukrainanıñ territorial bütünligi ve mustaqilligi printsipinden kelip çıqqan zorbalıqsız, Ukrainadaki bütün siyasiy küçler arasında dialog qurmaq ve barışıq yollarını araştıruvdan ibarettir.

Körüşüvniñ soñunda taraflar qırımtatar halqı aqlarını ğayrıdan tiklev meselelerini muzakere etmek içün konsultatsiya ve körüşüvlerni devam etmege azırlıqlarını bildirdiler.

Körüşüvde Meclisniñ Almaniyadaki temsilcisi Ahtem Ozay ve Tış işleri nazirliginiñ Rusiye, Ukraina, Beyazrusiye, Moldova devletlerinen alâqalar ve Şarqiy ortaqlıq boyunca bölüginiñ hadimi doktor Matias Rot iştirak ettiler.