Noman Çelebicihannıñ hatırasına bağışlanğan tedbirlerni azırlav ve keçirüv boyunca teşkiliy komitetniñ toplaşuvı

04 Fevral 2014

2014 senesi fevral 4 künü Noman Çelebicihannıñ hatırasına bağışlanğan tedbirlerni azırlav ve keçirüv boyunca teşkiliy komitetniñ birinci toplaşuvı olıp keçti. Teşkiliy komitet erkânı Milliy Meclisniñ 2014 senesi 25 yanvar künü alınğan qarar ile tasdiqlandı.

Toplaşuv devamında Esas olaraq Noman Çelebicihan vefatınıñ 96 yıllığına tedbirler planınıñ leyhası qabul etildi.

Cümleden, Teşkiliy komitet reisi Ayder Acimambetovnıñ bildirgenine köre 2014 yılı qırımtatar halqınıñ belli siyasiy ve cemaat erbabı, Qırım, Poloniya, Litvaniya ve Beyazrusiye müftiyi Noman Çelebicihannıñ hatırasına bağışlanğan tedbirler çerçivesinde Qırımnıñ bütün camilerinde dua ve hutbeler oqulacaq, fevral 23 künü Aqmescit ve Aqyarda matem mitingleri, Canköy, Kezlev, Qurman ve Keriç rayonlarında hatıra aqşamları keçirilecek.

Teşkiliy komitet azası Emine Avamileva haber etti ki, fevral 19-23 künleri qırımtatar tilinde tasil berilgen mektep ve sınıf talebeleri arasında Noman Çelebicihannıñ siyasiy ve diniy faaliyetine bağışlanıp ifadeli oquv yarışı ötkerilecek.

Bundan da ğayrı studentler ve cemaat teşkilâtlarınıñ vekilleri içün Noman Çelebicihannıñ hatırasına bağışlanğan aqşamlar teşkil etilecek. Teşkiliy komitet azası Seydamet Yağyayevniñ bildirgenine köre 2013 senesi QMPU qırımtatar ve türk filologiyası fakultetinde açılğan Noman Çelebicihan müzeyinde mahsus lektsiya oqulacaq, bunıñ kibi de QMPUda küreş boyunca yarışlar keçirilmesi de planlaştırıldı.

Teşkiliy komitet reisi teşkiliy komitet adına Aqmescitteki Çehov soqağındaki 20-nci evde yani 1917-1918 senelerde Musulman komitetiniñ ofisi yerleşken binada hatıra tahtasını asmaq teklifi tüşken. A. Acimambetovnıñ aytqanına köre mezkür mesele Aqmescit regional meclisniñ yaqın vaqıtta olacaq toplaşuvında baqılıp, fevral-mart ayları içinde tahtanıñ tantanalı açılışı közde tutula.