Nariman Celâl: «Amethan Sultan – bizim eñ belli ve namlı qaramanlarımızdan biridir»

01 Fevral 2014

2014 senesi fevral 1 künü Büyük-Onlar qasabasında Sovetler Birliginiñ eki defa Qaramanı uçucı-sınavcı Amethan Sultan vefatınıñ yıldönümi munasebetinen gençler arasında küreş boyunca “Küreş” Qırım federatsiyası teşkilâtlandırğan 5-nci cumhuriyet yarışı keçirildi.

Büyük-Onlar qasabasında ötkerilgen tedbir çerçivesinde suvuq avağa baqmadan Amethan Sultanğa bağışlanğan sergi, Alabaş-Koñrat köyündeki Amethan Sultan adına soqaqta ise hatıra tahtası açıldı.

Turnirde Meclis reisiniñ muavini Nariman Celâl, Meclis Kâtibiyetiniñ başı Dilâver Akiyev, Meclisniñ sport ve gençler siyaseti idaresiniñ başı Seydamet Yağyayev, Meclis azası Gülnara Bekirova, qasaba reisi Vasiliy Grabovan, Amurskiy köy şurasınıñ reisi Rustem Bekirov bulundılar.

Nariman Celâl öz çıqışında yarış iştirakçileri ve küreşçilerge Meclis reisi Refat Çubarovnıñ selâmını bildirdi.

“Amethan Sultan bizim eñ belli ve namlı qaramanlarımızdan biri olğanını bilemiz. Amma qırımtatarlar arasında çoq qaramanlar bar. Sürgünlikte sağ qalğan qartana-qartbabalarımız da qaramanlar. Sürgünlikten Qırımğa qaytıp kelgenler de qaramandırlar, _ dedi Meclis reisiniñ muavini. – Eminim ki, gençlerimiz Amethan Sultan ve onıñ kibi batırlarımızdan ibret almaq kerekler. Qırımtatar halqı Meclisiniñ adından “Küreş” Qırım milliy küreş federatsiyasına qaramanlarımıznı unutmayıp, böyle tedbirler keçirgenleri içün teşekkür bildirem. Bunıñ kibi de, qaramanlarımıznıñ hatırasını añmaq ve yüreklerimizde yaşatmaq imkânını bergen böyle tedbirlerni teşkil etüv ve keçirüv işlerine qoltutqan Büyük-Onlar qasabasınıñ akimlerine de minnetdarlıq bildirmek isteyim “

Turnirde Büyük Onlar, Aqmescit, Saq, Kezlev, Seytler ve Qırımnıñ diger yerlerinden kelgen küreşçiler sekiz çeki kategoriyasında küç sınaştılar. Ğaliplerge medaller, kubok, fahriy yarlıqlar ve qıymetli bahşışlar berildi.