Qara tehnologiyalarnıñ sımarışçıları ve icracıları qanunğa köre cevap berirler

31 Yanvar 2014

Soñki vaqıtta sahtekârlıq ve qara tehnologiyalarnıñ yardımınen Qırımda milletlerara munasebetlerni kerginleştirmek areketleri ep quvetleşe. Cümleden, içtimaiy ağlar vastasınen informatsion alanğa güya işançlı menbalardan alınğan çeşit sahte ve provokatsion haberler tarqatıla.

Qırımtatar halqı Meclisiniñ azaları ve umumen Meclis adına yapılğan bu areketlerniñ maqsadı qırımtatar halqınıñ milliy areketi ve onıñ esas printsipi olğan zorbalıqsız printsipiniñ itibarını tüşürmek, qırım cemiyetine qorqu siñdirmek, çeşit millet adamları arasına şına qaqmaqtır.

Qırımtatar halqınıñ Meclisi Qırımda içtimaiy-siyasiy vaziyetni kerginleştirmek içün pis tehnologiyalarnı qullanuvnıñ er angi areketlerini qaralap, olarnıñ sımarışçıları ve icracılarını Ukrainanıñ mevcut qanunlarına köre cevapkârlıqqa çekileceklerini tenbiley.
 

Qırımtatar halqı Meclisiniñ

matbuat hızmeti